لکھنؤ :(ایجنسی)
وزیر اعظم مودی اتر پردیش کے وزیر اعلیٰ یوگی آدتیہ ناتھ کی تقریب حلف برداری میں بطور مہمان خصوصی شرکت کریں گے۔ تقریب حلف برداری کی تیاریاں زور و شور سے جاری ہیں۔ جمعہ، 25 مارچ کو یوگی آدتیہ ناتھ دوسری بار اتر پردیش کے وزیر اعلیٰ کے طور پر حلف لیں گے۔ اس کے ساتھ سیاست اور صنعت کے کئی اہم شخصیات بھی تقریب میں شریک ہوں گی۔
مرکزی وزیر داخلہ امت شاہ، بی جے پی کے قومی صدر جے پی نڈا بھی حلف برداری کی تقریب میں شرکت کریں گے۔ بی جے پی کی حکومت والی ریاستوں کے وزرائے اعلیٰ اور سابق وزرائے اعلیٰ کو بھی مدعو کیا گیا ہے۔
حلف برداری کی تقریب میں اپوزیشن کے رہنماؤں کو بھی مدعو کیا گیا ہے۔ کانگریس صدر سونیا گاندھی اس تقریب میں شرکت کر سکتی ہیں۔
اس کے علاوہ فلمی دنیا سے بالی ووڈ اسٹارز اکشے کمار، کنگنا رناوت، بونی کپور کو بھی مدعو کیا گیا ہے۔
حال ہی میں ریلیز ہونے والی فلم ’دی کشمیر فائلز‘ کی ٹیم کو بھی مدعو کیا گیا ہے۔ اداکار انوپم کھیر اور ہدایت کار وویک اگنی ہوتری تقریب میں شرکت کر سکتے ہیں۔
حلف برداری کی تقریب لکھنؤ کے بھارت رتن شری اٹل بہاری واجپئی ایکانہ کرکٹ اسٹیڈیم میں ہوگی۔ اس سال آئی پی ایل کے میچ بھی اسٹیڈیم میں کھیلے جائیں گے۔
75 ہزار افراد کے بیٹھنے کا انتظام !
جانکاری کے مطابق چیف سکریٹری ڈی ایس مشرا کی قیادت میں حلف برداری کی تقریب کی تیاریاں کی جارہی ہیں۔ حلف برداری کی تقریب میں 75 ہزار لوگوں کے بیٹھنے کا انتظام ہے۔ ایکانہ اسٹیڈیم کے قریب ہیلی پیڈ بنایا جا رہا ہے۔ ہیلی پیڈ سے اسٹیڈیم تک 350 میٹر کی سڑک بھی بنائی جارہی ہے۔ اس کے لیے تقریباً 100 مزدور لگائے گئے ہیں۔
ارجن گنج سے ایکانہ اسٹیڈیم تک تقریباً 5 ہزار گملے لگائے جائیں گے۔ ستونوں پر ایل ای ڈی لائٹس اور رنگین اسکرٹنگ کا بھی انتظام کیا گیا ہے۔ پروگرام کی شان و شوکت کا اندازہ اس بات سے بھی لگایا جا سکتا ہے کہ 24 اور 25 مارچ کے لیے 45 بڑے اور 70 چھوٹے ہوٹلوں میں وی وی آئی پی مہمانوں کے لیے 5000 کمرے بک کیے گئے ہیں۔
