پوتن مخالف واگنر گروپ کے رہنما پريگوژن طیارہ حادثے میں ہلاک

نئی دہلی (ڈی ڈبلیو)واگنر سے منسلک میڈیا نے بتایا کہ نجی فوجی گروپ واگنر کے بانی یوگینی  پريگوژن اس کمرشل پرائیوٹ جیٹ پر سوار تھے جو بدھ کو روس میں گر کر تباہ ہوگیا۔ اطلاعات کے مطابق طیارے میں سوار تمام دس افراد ہلاک ہو گئے۔
روسی حکام کے مطابق بدھ کی شام ماسکو کے شمال میں گرکر تباہ ہونے والے ایک پرائیوٹ طیارے میں سوار مسافروں کی فہرست میں یوگینی  پريگوژن کا نام بھی شامل ہے۔ یہ طیارہ ماسکو سے سینٹ پیٹرز برگ جارہا تھا کہ ٹیور ریجن میں کوچیکینو گاوں کے قریب گر کر تباہ ہو گیا۔
روسی خبر رساں ایجنسی آر آئی اے نووستی نے بتایا کہ جہاز میں سات مسافر اور عملے کے تین افراد شامل تھے اور تمام ہلاک ہو گئے۔ ابتدائی تحقیقات کے بعد جائے حادثہ سے آٹھ لاشیں مل چکی ہیں۔روس کی ایوی ایشن ایجنسی روسا وتاسیا نے ایک بیان میں کہا، "ایئر لائن کے مطابق ایمبیریر 135 طیارے پر درج ذیل مسافر سوار تھے… یوگینی پریگوزن۔”
روساوتاسا کے مطابق پریگوزن کے ایک ساتھی اور ان کی کارروائیوں کے منتظم دمیتری یوتکن بھی اس ہوائی جہاز پر سفر کررہے تھے۔
پريگوژنکی موت پر کوئی حیرت نہیں، امریکہ
وائٹ ہاوس نے اس حوالے سے تبصرہ کرتے ہوئے کہا کہ "ہم نے بھی خبریں دیکھی ہیں اور اگران کی تصدیق ہوتی ہے تو کسی کو اس پر حیرت نہیں ہونی چاہئے۔”
 صدر جو بائیڈن نے بھی اس حوالے سے میڈیا سے بات چیت کی۔بائیڈن نے کہا،” حقیقت کے طور پر مجھے نہیں معلوم کہ ہوا کیا ہے، لیکن میں حیرت زدہ ہوں۔ روس میں ایسا بہت کچھ نہیں ہوتا جس میں (صدر) پوٹن کا ہاتھ نہیں ہوتا۔ لیکن مجھے نہیں معلوم کہ اس کا خاطر خواہ جواب کیا ہو سکتا ہے۔”