نئی دہلی :(ایجنسی)
وزیر اعظم نریندر مودی پیر 11 اپریل کو امریکی صدر جو بائیڈن کے ساتھ ورچوئل میٹنگ کریں گے۔ اس دوران دونوں رہنما دوطرفہ تعاون کا جائزہ لیں گے اور جنوبی ایشیا، ہند-بحرالکاہل خطے اور باہمی دلچسپی کے عالمی مسائل پر حالیہ پیش رفت پر تبادلہ خیال کریں گے۔ وزارت خارجہ کے مطابق ورچوئل میٹنگ سے دونوں ممالک کے درمیان دوطرفہ عالمی تزویراتی شراکت داری کو مزید تقویت ملے گی۔ اس کے ساتھ دونوں ممالک کے درمیان تعلقات کو مضبوط بنانے میں بھی مدد ملے گی۔
وزارت خارجہ کے مطابق، لیڈروں کی ورچوئل میٹنگ چوتھی ہندوستان-امریکہ 2+2 وزارتی ڈائیلاگ سے پہلے ہوگی۔ ٹو پلس ٹو میٹنگ کی قیادت وزیر دفاع راج ناتھ سنگھ، وزیر خارجہ ایس جے شنکر اور ان کے امریکی ہم منصب وزیر دفاع لائیڈ آسٹن اور وزیر خارجہ انٹونی بلنکن کریں گے۔
دریں اثنا، وائٹ ہاؤس کے پریس سکریٹری جین ساکی نے ایک بیان جاری کرتے ہوئے کہا کہ بائیڈن پیر کو ہندوستان کے وزیر اعظم مودی کے ساتھ ایک ورچوئل میٹنگ کریں گے تاکہ ہندوستان اور امریکہ کی حکومتوں، معیشتوں اور ہمارے لوگوں کے درمیان تعلقات کو مزید گہرا کیا جا سکے۔ اس دوران دونوں رہنما باہمی تعاون کے کئی امور پر تبادلہ خیال کریں گے۔ اس میں کورونا سے نمٹنا، آب و ہوا کے بحران سے نمٹنا، عالمی معیشت کو مضبوط بنانا اور انڈو پیسیفک میں سیکورٹی جیسے اہم مسائل شامل ہیں۔
