منی لانڈرنگ معاملہ: ED کی چارج شیٹ میں پرینکا گاندھی کا بھی نام

نئی دہلی: کانگریس پارٹی کی جنرل سکریٹری پرینکا گاندھی کی مشکلات میں اضافہ ہوتا نظر آرہا ہے۔ ED نے فرید آباد، ہریانہ میں زمین کی خریداری سے متعلق معاملے میں پرینکا گاندھی کے خلاف چارج شیٹ میں ان کا نام شامل کیا ہے۔ تاہم اس چارج شیٹ میں پرینکا کا نام بطور ملزم شامل نہیں کیا گیا ہے۔ اس کے ساتھ ان کے شوہر رابرٹ واڈرا کا نام بھی شامل کیا گیا ہے۔ تاہم ان کو بھی بطور ملزم نامزد نہیں کیا گیا ہے۔
•ہریانہ میں زمین خریدی گئی۔
انفورسمنٹ ڈائریکٹوریٹ (ای ڈی) نے بتایا ہے کہ رابرٹ واڈرا اور ان کی بیوی پرینکا گاندھی واڈرا نے دہلی میں رہنے والے ایک ریئل اسٹیٹ ایجنٹ کے ذریعے ہریانہ میں زمین خریدی تھی۔ اس ایجنٹ نے این آر آئی بزنس مین سی سی تھمپی کو بھی زمین بیچی۔ ای ڈی کا کہنا ہے کہ واڈرا اور تھمپی کا آپس میں رشتہ ہے اور ایک جیسے کاروبار کرنے کے علاوہ دونوں مل کر بہت سے کام کرتے ہیں۔ یہ ایک بڑا کیس ہے، جس کا تعلق مفرور اسلحہ ڈیلر سنجے بھنڈاری سے ہے۔
ای ڈی کے مطابق، 2005-2006 کے درمیان، رابرٹ واڈرا نے فرید آباد کے امی پور گاؤں میں پراپرٹی ڈیلر ایچ ایل پاہوا (تھمپی کے قریبی) کے ذریعے تقریباً 40.8 ایکڑ زمین خریدی تھی، جسے دسمبر 2010 میں پاہوا کو واپس بیچ دیا گیا تھا۔ اسی طرح، اپریل 2006 میں اسی امی پور گاؤں میں پرینکا گاندھی واڈرا کے نام پر ایک مکان خریدا گیا تھا، جسے فروری 2010 میں واپس پاہوا کو فروخت کر دیا گیا تھا۔ ذرائع کے مطابق پاہوا تھمپی کے بہت قریب ہے، یہ پاہوا ہی تھا جس نے اسی امی پور گاؤں میں تھمپی کی زمین خریدی تھی۔