ایم پی کی اے ٹی ایس نے گیارہ افراد کو گرفتار کیا، کالعدم حزب التحریر سے وابستگی کا دعویٰ

بھوپال مدھیہ پردیش میں کالعدم تنظیم حزب التحریر کے خلاف کریک ڈاؤن کیا گیا ہے ہندی روزنامہ نئی دنیا کی رپورٹ کے مطابق مدھیہ پردیش کے انسداد دہشت گردی اسکواڈ (اے ٹی ایس) نے منگل کو 11مشتبہ افراد کو گرفتار کیا، جن میں 10 بھوپال سے اور ایک کا تعلق چھندواڑہ سے ہے خبر کے مطابق بھوپال میں گرفتار ملزم سے مبینہ طور پر تعلق رکھنے والے پانچ لوگوں کو حیدرآباد سے گرفتار کیا گیا ہے۔ انہیں بھوپال لایا جا رہا ہے۔ ہندی روزنامہ نیی دنیا نے اپنی رپورٹ میں بتایا کہ یہ اطلاع مدھیہ پردیش پولیس ہیڈ کوارٹر نے دی ہے۔
رپورٹ میں دعویٰ کیا گیا ہے کہ تلاشی کے دوران ان کے پاس سے بڑی مقدار میں ساز و سامان، ملک دشمن اور جہادی لٹریچر، دھماکہ خیز مواد بنانے کا لٹریچر اور مواد اور ڈیجیٹل دستاویزات برآمد ہوئے ہیں۔ رپورٹ کے مطابق کالعدم تنظیم حزب التحریر کا مقصد لوگوں کو ہندوستان میں اسلامی شریعت نافذ کرنے پر اکسانا ہے۔ تمام گرفتار ملزمان کو منگل کی شام بھوپال ڈسٹرکٹ کورٹ میں پیش کیا گیا، جہاں سے اے ٹی ایس نے انہیں پوچھ گچھ کے لیے 19 مئی تک ریمانڈ پر لے لیا ہے۔ کہا جارہا ہے کہ انکوائری میں ان سے جڑے کچھ اور لوگوں کی معلومات سامنے آسکتی ہیں۔ اس کے ساتھ یہ بھی معلوم ہوگا کہ ان کا منصوبہ اور حکمت عملی کیا تھی۔ رپورٹ میں یہ عجیب و غریب دلیل دی گئی ہے کہ ملزمان عام لوگوں میں جم ٹرینر، کمپیوٹر ٹیکنیشن، درزی، آٹو ڈرائیور وغیرہ کے طور پر کام کرتے تھے۔ اے ٹی ایس کی پوچھ گچھ میں یہ بات بھی سامنے آئی ہے کہ ملزمان نے اپنے ہدف ا کو حاصل کرنے کے لیے ڈرون کیمروں کا استعمال کیا۔