وقف بل  پر میری حکومت آپ کے ساتھ کھڑی ہے: بورڈ کے وفد سے ملاقات میں ہیمنت سورین کا وعدہ

رانچی:جھارکھنڈ کے وزیر اعلیٰ ہیمنت سورین نے وقف ترمیمی بل کو غیر آئینی، غیر جمہوری اور بھارتیہ جنتا پارٹی کی فرقہ وارانہ ذہنیت اور سماج کو بانٹنے کی سوچ کا آئینہ قرار دیا۔ یہ بات انہوں نے آج آل انڈیا مسلم پرسنل لا بورڈ کے ایک اعلیٰ سطحی وفد سے کہی۔ وقف کانفرنس کے موقعہ پر یہ ملاقات عمل میں آئی۔
آل انڈیا مسلم پرسنل لا بور ڈ کے وفد کی قیادت بورڈ کے صدر مولانا خالد سیف اللہ رحمانی نے کی۔ وفد میں بورڈ کے جنرل سکریٹری مولانا محمد فضل الرحیم مجددی، ترجمان ڈاکٹر سید قاسم رسول الیاس، مولانا ابو طالب رحمانی، ممبر بورڈ اور جھارکھنڈ میں موجود بورڈ کے ممبران ڈاکٹر محمد یسین قاسمی، مولانا مفتی نذر توحید اور ڈاکٹر مجید عالم شامل تھے۔ اقلیتی امور کے وزیر جناب حفیظ الحسن انصاری نے اس ملاقات کے لئے کلیدی رول ادا کیا اور ملاقات میں بھی موجود رہےصدر بورڈ  نےتفصیل سے اسلام میں اوقاف کی اہمیت اور اس کے تقاضوں پر روشنی ڈالی اور کہا کہ جتنی اوقافی املاک ہیں وہ سرکار کی زمینیں نہیں ہیں بلکہ بہت سارے مسلمانوں نے ہر دور میں مساجد، عیدگاہوں، قبرستان، درگاہ و مدارس کے لئے بطور صدقہ جاریہ اپنی ذاتی املاک کو وقف کیا ہے اور کئی خیراتی و انسانوں کی فلاح و بہبود کے لئے بھی اپنی املاک کو وقف کیا ہے۔ جس سے مسلم و غیر مسلم سبھی فائدہ اٹھاتے ہیں۔ اس کے بعد مولانا نے موجودہ وقف ترمیمی بل 2024 کے ذریعہ کس طرح حکومت وقف ایکٹ 1995کو کمزور کرکے سینٹرل وقف کونسل اور وقف بورڈوں کو براہ راست اپنے کنٹرول میں لے کر وقف املاک پر قبضے کا راستہ ہموار کررہی ہے۔ مولانا نے وزیر اعلیٰ سے درخواست کی کہ اگر وقف بل پارلیمنٹ میں دوبارہ پیش کیا گیا تو ہم چاہیں گے کہ آپ کے ممبران پارلیمنٹ اس کی پرزور مخالفت کریں اور اسے مسترد کروانے میں اپنا کردار ادا کریں۔
بورڈ کے ترجمان نے کہا حکومت کا پہلا نشانہ تو مسلمان اور ان کی اوقافی املاک ہوسکتی ہیں تاہم اس کے بعد اندیشہ ہے کہ سکھوں، عیسائیوں، بدھسٹوں اور ہندوؤں کی اوقاف کا بھی نمبر آئے گا۔ بورڈ کے جنرل سکریٹری مولانا محمد فضل الرحیم مجددی نے بورڈ کا تعارف کرواتے ہوئے کہا کہ بورڈ مسلمانوں کا ایک مشترکہ اور متفقہ پلیٹ فارم ہے۔ بورڈ کی آواز تمام مسلمانوں کی آواز ہے۔
وزیر اعلیٰ نے جواب میں کہا کہ میری حکومت پوری طرح آپ کے ساتھ ہے ہم کل ہی اپنی کابینہ سے اس کے خلاف ایک قرارداد منظور کریں گے۔ میں آپ کو وشواس دلاتا ہوں کہ ہمارے ممبران پارلیمنٹ بھی پوری طاقت سے ایوان میں اس کی مخالفت کریں گے۔
آخر میں وفد نے بورڈ کی جانب سے بل کے جائزہ پر مبنی ایک تفصیلی نوٹ بھی وزیر اعلیٰ کو سونپا اور ان کے پرجوش اور حوصلہ افزا اظہار خیال اور حمایت پر ان کا شکریہ بھی ادا کیا۔(سورس:پریس ریلیز)