نیا فرمان :ٹیچروں کو سر ،میڈم نہیں گرو جی اور دیدی کہنا ہوگا،صرف “بھارتیہ لباس “کی اجازت

اتر پردیش میں ٹیچرز  کو اب ‘سر’ اور ‘میڈم’ نہیں بلکہ ‘گروجی’ اور ‘دیدی’ یا ‘بہن’ کہہ کر مخاطب کیا جائے گا۔ لڑکیاں اب مرد طالب علموں کو بھائی کہہ کر پکاریں گی، جب کہ طالبات اب بڑی طالبات کو دیدی کہہ کر پکاریں گی۔ یہ حکم یوپی کے سنبھل میں ضلع افسر نے جاری کیا ہے۔ آرڈر میں مزید کہا گیا ہے کہ ‘جئے ہند’ اور ‘نمستے’ کو مبارکباد کے لیے استعمال کرنا ہوگا۔ اس کے ساتھ ہی اب اساتذہ کے جینز اور ٹی شرٹ پہن کر ضلع کے کونسل اسکولوں میں آنے پر پابندی لگا دی گئی ہے۔
سنبھل ڈسٹرکٹ بیسک ایجوکیشن آفیسر الکا شرما نے اس سلسلے میں حکم جاری کیا ہے۔ طلبہ، اساتذہ اور عہدیداروں کے طرز عمل کے لیے کئی ہدایات جاری کی گئی ہیں۔  بی ایس اے کا خیال ہے کہ اس تبدیلی سے ہندوستانی ثقافت کو فروغ ملے گا اور ایک دوسرے کے لیے احترام میں اضافہ ہوگا۔ حکم نامے میں یہ بھی کہا گیا ہے کہ جوتے کلاس روم کے باہر اتارے جائیں گے۔
جینز، ٹی شرٹ سکول میں نہیں چلے گی۔
ہدایات میں کہا گیا ہے کہ اساتذہ، ملازمین اور افسران اسکولوں اور دفاتر میں صرف ہندوستانی لباس پہنیں۔ اسکولوں میں طلبہ کے لیے یونیفارم ضروری ہے ، اب اساتذہ بھی جینز اور ٹی شرٹ پہن کر اسکول نہیں آسکیں گے۔ یہ بھی کہا گیا ہے کہ ڈی ایم کے معائنہ کے دوران کچھ اساتذہ اور ملازمین اپنی شرٹ کے اوپری بٹن کو کھلا رکھتے ہیں، یہ ناقابل قبول ہے۔