مہرولی کی مسمارشدہ مسجد اخو نجی کی جگہ نماز پڑھنے کی اجازت نہیں :دہلی ہائی کورٹ

نئی دہلی: مسمار کی گئی مسجد اخونجی میں نماز نہیں پڑھ سکتے خبر کے مطابق دہلی ہائی کورٹ نے جمعہ کے روز اس درخواست کو مسترد کر دیا جس میں شبِ برات کے موقع پر مہرولی علاقے میں حال ہی میں منہدم کی گئی 600 سالہ قدیم مسجد اخونجی کے مقام پر نماز ادا کرنے اور قبروں پر جانے کی اجازت طلب کی گئی تھی۔
خیال رہے کہ  مسجد اخوندجی، جہاں مدرسہ بحرالعلوم اور قابل احترام شخصیات کی قبریں تھیں کو فروری کے اوائل میں مسمار کر دیا گیا تھا۔ ڈی ڈی اے اور محکمہ جنگلات نے مل کر یہ کارروائی انجام دی تھی۔ رپورٹ کے مطابق یہ مسجد سلطان شمس الدین التمش کے دور کی تھی اور اسے مسجد جنات بھی کہا جاتا تھا۔ واضح رہے کہ انتظامیہ نے کارروائی کرتے ہوئے یہاں موجود ایک مندر کو بھی منہدم کر دیا تھا
جسٹس پروشیندر کمار کورو نے دہلی وقف بورڈ کی انتظامی کمیٹی کی جانب سے دائر کردہ درخواست کو یہ کہہ کر مسترد کر دیا کہ عدالت اس مرحلے پر کسی بھی قسم کی ہدایت جاری کرنے میں دلچسپی نہیں رکتھی، کیونکہ معاملہ سال 2022 سے ہی عدالت میں زیر التوا ہے۔
جسٹس کورو نے کہا کہ یہ جگہ اس وقت دہلی ترقیاتی اتھارٹی (ڈی ڈی اے) کے قبضے میں ہے، اور عدالت نے پہلے ہی اس علاقے کے لیے جہاں مسجد تھی، اسٹیٹس کو برقرار رکھنے کا حکم دیا ہے۔ عدالت نے کہا کہ نمازوں اور قبرستان میں بلا رکاوٹ داخلے کی درخواست ایک لازمی پابندی کی فرمائش ہے، جسے وہ اس وقت قبول کرنے کے لئے راضی نہیں ہے۔۔
دہلی وقف بورڈ کی انتظامی کمیٹی کی نمائندگی کرنے والے ایڈوکیٹ شمس خواجہ نے شب برات کی اہمیت کے پیش نظر درخواست کی فوری ضرورت پر زور دیا۔ انہوں نے دلیل دی کہ 600 سال پرانی مسجد کو ڈی ڈی اے حکام نے غیر قانونی طور پر منہدم کر دیا تھا۔
تاہم، ڈی ڈبلیو بی کے وکیل نے درخواست کی مخالفت کرتے ہوئے مسجد کی عمر اور اس کی وقف جائیداد کی حیثیت سے اختلاف کیا۔ عدالت نے فریقین کے دلائل سننے کے بعد درخواست مسترد کر دی۔