مین پوری ؍کرہل :(ایجنسی)
اتر پردیش اسمبلی انتخابات کے تیسرے مرحلے میں جن ہائی پروفائل سیٹوں پر مقابلہ ہونا ہے ،ان میں سے ایک مین پوری کی کرہل اسمبلی سیٹ ہے۔ سماج وادی پارٹی کے سربراہ اکھلیش یادو یہاں سے انتخاب لڑ رہے ہیں، جبکہ مرکزی وزیر ایس پی سنگھ بگھیل ان کے سامنے ہیں۔ بی جے پی امیدوار ایس پی سنگھ بگھیل کی حمایت میں انتخابی تشہیر کرہل پہنچے وزیر داخلہ امت شاہ نے سماج وادی پارٹی پر سخت نشانہ لگایا۔ اس کے ساتھ ہی انہوں نے جلسہ عام سے خطاب کرتے ہوئے کہا کہ اگر کرہل میں کمل کھلے گا تو یوپی میں سماج وادی پارٹی کا مکمل صفایا ہو جائے گا۔
کرہل میں ایک جلسہ عام سے خطاب کرتے ہوئے امت شاہ نے کہا کہ میں کرہل کے لوگوں سے پوچھنا چاہتا ہوں کہ آپ چاہتے ہیں کہ مودی جی کی قیادت میں 300 سے زیادہ سیٹوں کے ساتھ بی جے پی کی حکومت بنے۔ اس کے لیے300 سیٹوں کا ایک کام ایک ہی سیٹ سے ہو سکتا ہے ۔ آپ کرہل میں کمل کھلا دیجئے ، پورے یوپی سے ایس پی کا صفایا ہوجائے گا ۔
امت شاہ نے کہا کہ میں ٹی وی پر دیکھ رہا تھا، اکھلیش نے کہا تھا کہ وہ کاغذات جمع کرانے کے بعد 10 مارچ کو آئیں گے۔ چھٹے ہی دن میدان میں آگئے اور اس سخت دھوپ میں اتنی عمر کے لیڈر کو بھی میدان میں اترنا پڑا گیا ہے۔ بھائی بتاؤ اگر یہ آغاز ہے تو انجام کیسا ہوگا؟ یوپی میں کمل جیتے گا۔ امت شاہ نے یہ باتیں اس تناظر میں کہی جب ایس پی کے سرپرست اور کھلیش یادو کے والد ملائم سنگھ یادو ایک جلسہ عام سے خطاب کرنے کرہل پہنچے تھے۔
وزیر داخلہ نے کہا، ’ایس پی سنگھ بگھیل بی جے پی لیڈر ہیں، ان پر کچھ دن پہلے حملہ ہوا تھا۔ سماج وادی پارٹی کے لوگ کیا سمجھتے ہیں کہ بی جے پی لیڈر اس طرح کے حملے سے خوفزدہ ہوں گے؟ بی جے پی لیڈر بھی زیادہ طاقت کے ساتھ مہم چلائیں گے اور جیتنے کے بعد آئیں گے۔‘
انہوں نے کہا کہ اکھلیش کے خاندان کے 45 لوگوں کو ایس پی حکومت میں مختلف عہدے ملے ہیں۔ یہ لوگ صرف خاندان کا سوچتے ہیں، اپنے لوگوں کا سوچتے ہیں۔ وہ معاشرے کا بھلا نہیں کرتے۔ مودی حکومت نے سب کا ساتھ، سب کا وکاس کا نعرہ دے کر سب کا بھلا کیا ہے۔
