امریکہ کے دباؤ میں ‘آپریشن سندور’ روکا گیا،سنجے سنگھ کا الزام کہا،یہ قومی سالمیت سے سمجھوتہ

عام آدمی پارٹی  نے ہندوستان اور پاکستان کے درمیان امریکہ کی ثالثی میں ہونے والی جنگ بندی پر نریندر مودی کی زیر قیادت مرکزی حکومت پر سخت حملہ کیا ہے، اور اسے ہندوستان کی خودمختاری پر کاری ضرب اور قومی سالمیت کے ساتھ سنگین سمجھوتہ قرار دیا ہے۔
پارٹی نے یہ بھی دعویٰ کیا کہ پاکستان اور پاکستان کے زیر قبضہ کشمیر (پی او کے) میں اہداف کے خلاف آپریشن سندور کو امریکی دباؤ پر روک دیا گیا تھا۔
اتوار کو یہاں ایک پریس کانفرنس سے خطاب کرتے ہوئے، اے اے پی کے سینئر رہنما اور راجیہ سبھا کے رکن سنجے سنگھ نے مودی حکومت کی جانب سے تیسرے فریق کی ثالثی کو قبول کرنے پر سوال اٹھایا، جس نے پاکستان کے ساتھ معاملات کو دو طرفہ طور پر حل کرنے کے ہندوستان کے دیرینہ موقف کو توڑا۔
سنگھ نے امریکی صدر ڈونلڈ ٹرمپ کے جنگ بندی کے اعلان پر تنقید کی اور وزیر اعظم سے وضاحت طلب کی۔
انہوں نے کہا”78 سالوں سے، بھارت نے پاکستان سے متعلق معاملات میں تیسرے فریق کی ثالثی کو مضبوطی سے مسترد کیا ہے – پھر آج یہاں امریکہ کا کیا کام ہے؟”   انہوں نے وزیر اعظم پر زور دیا کہ وہ جنگ بندی پر حکومت کے موقف کو واضح کرنے کے لیے کل جماعتی اجلاس اور پارلیمنٹ کا خصوصی اجلاس بلائیں، جسے انہوں نے "قومی غیرت کے حوالے” کے طور پر بیان کیا۔
پچھلے مہینے پہلگام حملے کا ذکر کرتے ہوئے سنگھ نے کہا کہ دہشت گردوں نے ہماری بہنوں کے ماتھے سے سندور چھین لیا۔  انہوں نے کہا، "پاکستان کی حمایت اور مالی مدد سے، وہ 200 کلومیٹر تک ہندوستانی علاقے میں گھس گئے، ایک وحشیانہ حملہ کیا، اور بغیر کسی چیلنج کے واپس چلے گئے پوری قوم مشتعل ہے،”
سنگھ نے کہا کہ حکومت نے ایک آل پارٹی میٹنگ بلائی تھی اور آپریشن سندور شروع کیا تھا، جس کے تحت ہندوستانی فوج مبینہ طور پر پاکستانی حدود میں داخل ہوئی اور نو دہشت گرد کیمپوں کو تباہ کر دیا۔  سنگھ کے مطابق، حکومت نے دعویٰ کیا کہ 100 سے زیادہ دہشت گردوں کو بے اثر کر دیا گیا ہے اور 21 شناخت شدہ کیمپوں کو ختم کرنے کے منصوبے کے ساتھ آپریشن ابھی بھی جاری ہے۔ سنگھ نے کہا، "ہماری فوج سرحدوں پر بے مثال جرات کا مظاہرہ کر رہی تھی، ڈرون حملوں کو ناکام بنا رہی تھی، پاکستانی ڈرونز اور ایئربیس کو تباہ کر رہی تھی،” سنجے  سنگھ نے حکومت سے مکمل شفافیت کا مطالبہ کیا۔  انہوں نے کہا کہ وزیر اعظم کو قوم اور پارلیمنٹ سے خطاب کرنا چاہیے۔ عوام یہ جاننے کے مستحق ہیں کہ کس دباؤ میں اس جنگ بندی پر اتفاق کیا گیا اور ہندوستان کی خودمختاری اور اسٹریٹجک اہداف کے لیے اس کا کیا مطلب ہے۔