نئی دہلی :(ایجنسی)
دہلی کے وزیر اعلیٰ اروند کیجریوال اور عام آدمی پارٹی (آپ) کے خلاف ایف آئی آر درج کرنے کا حکم دیا گیا ہے۔ دراصل وزیر اعلیٰ کیجریوال اور آپ پر انتخابی ضابطہ اخلاق کی خلاف ورزی کا الزام ہے۔ اس سلسلے میں پنجاب کے چیف الیکٹورل افسر نے معاملہ درج کرنے کی ہدایت دی ہے۔ اکالی دل کے نائب صدر کے ذریعہ انتخابی کمیشن کو سونپی گئی ایک ویڈیو کی بنیاد پر یہ ہدایت دی گئی ہے۔ شکایت میں کہا گیا ہے کہ کیجریوال نے اپوزیشن لیڈروں کو غدار کہا ہے اور یہ انتخابی ضابطہ اخلاق کی خلاف ورزی کا معاملہ بنتا ہے۔
اکالی دل نے کہا ہے کہ آپ ویڈیو کے ذریعہ جھوٹ بول رہی ہے۔ پارٹی نے انتخابی کمیشن کے سامنے اپنی غلطی مانی، لیکن پھر سے ایک ویڈیو جاری کر دی گئی۔ اس ویڈیو میں مخالف لیڈروں کے خلاف قابل اعتراض بیانات دیے گئے ہیں۔ شکایت میں اکالی لیڈروں نے ایک ویڈیو انتخابی کمیشن کو سونپی تھی، جس میں مبینہ طور پر پنجاب میں اس بار جھاڑو (آپ کا انتخابی نشان) چلنے کی بات کو گانے کے طور پر پیش کیا گیا ہے۔ ویڈیو میں مبینہ طور پر چرنجیت سنگھ چنّی، سکھبیر سنگھ بادل اور سابق وزیر اعلیٰ کیپٹن امریندر سنگھ کی تصویر کا استعمال کرتے ہوئے انھیں غدار بتایا گیا ہے۔
پنجاب میں انتخاب سے ایک دن قبل آپ اور پارٹی سربراہ اروند کیجریوال پر ایف آئی آر درج کیے جانے کا حکم زوردار جھٹکا ہے۔ قابل ذکر ہے کہ پنجاب میں 20 فروری کو ووٹنگ ہونی ہے۔ ریاست کی 117 اسمبلی سیٹوں پر 1304 امیدوار میدان میں ہیں۔ ان کے لیے پنجاب کے 21275066 ووٹرس ووٹنگ کریں گے۔
