اعظم خان کے خلاف تین دن تک چلی چھاپے مار کارروائی، 800 کروڑ کی ٹیکس چوری کا شبہ

رام پور/نئی دہلی۔ محکمہ انکم ٹیکس نے سماج وادی پارٹی (ایس پی) لیڈر اعظم خان اور ان سے جڑے لوگوں کے گھر پر تین دن تک چھاپے مارنے کے بعد 800 کروڑ روپے سے زیادہ کی ٹیکس چوری کا شبہ ظاہر کیا ہے۔ سرکاری ذرائع نے جمعہ کو یہ اطلاع دی۔ بدھ کی صبح سات بجے انکم ٹیکس حکام سیکورٹی فورسز کے ساتھ اعظم خان کی جیل روڈ رہائش گاہ میں داخل ہوئے اور جمعہ کی شام سات بجے تک چھاپہ مار کارروائی جار
جمعہ کی شام 7 بجے کے قریب انکم ٹیکس حکام کے ان کی رہائش گاہ سے نکلنے کے بعد، اعظم خان نے کہا کہ یہ انکم ٹیکس محکمہ کی طرف سے چھاپہ مارا گیا تھا اور وہ تین دن تک یہاں رہے، تلاشی لی اور سوالات پوچھے۔ خان نے صحافیوں کے مزید سوالات کا جواب دینے سے انکار کر دیا۔ واضح ہو، انکم ٹیکس ڈیپارٹمنٹ نے بدھ (13 ستمبر) کو خان اور ان سے وابستہ لوگوں کے خلاف ٹیکس چوری کی تحقیقات کے ایک حصے کے طور پر اتر پردیش اور مدھیہ پردیش میں 30 سے زیادہ مقامات پر چھاپے مارے تھے۔ سرکاری ذرائع نے بتایا کہ محکمہ نے پڑوسی ریاست مدھیہ پردیش کے کچھ علاقوں کے علاوہ اتر پردیش کے رام پور، سہارنپور، لکھنؤ، غازی آباد اور میرٹھ میں چھاپے مارے ہیں۔ یہ کارروائی کچھ ٹرسٹ تنظیموں سے متعلق ہے جن کو اعظم خان اور ان کے خاندان کے افراد چلاتے ہیں۔ غازی آباد میں محکمہ انکم ٹیکس نے بدھ کو راج نگر کالونی میں واقع ایک رہائش گاہ پر چھاپہ مارا۔ یہ گھر ایکتا کوشک کا ہے جو خان خاندان کے قریب سمجھی جاتی ہیں۔
ذرائع نے بتایا کہ محکمہ انکم ٹیکس کی یہ جانچ خان اور ان کے خاندان کے افراد کے ذریعہ چلائے جانے والے کچھ ٹرسٹوں سے متعلق ہے۔ عہدیداروں نے بتایا کہ انکم ٹیکس محکمہ نے تحقیقات کا دائرہ وسیع کرتے ہوئے خان کی زیرقیادت محمد علی جوہر یونیورسٹی کے علاوہ محکمہ تعمیرات عامہ اور ضلع پنچایت آفس کی بھی چھان بین کی۔ انہوں نے کہا کہ سرکاری اخراجات کی فائلوں کی جانچ کی جا رہی ہے کیونکہ خان پر 800 کروڑ روپے سے زیادہ کی ٹیکس چوری کا شبہ ہے۔