امانت اللہ خان کو جھٹکا،کورٹ نے پیشگی ضمانت کی عرضی خارج کی

نئی دہلی:دہلی کی رازایونیو کورٹ نے دہلی وقف بورڈ کی بھرتیوں میں مبینہ  بے ضابطگیوں سے متعلق منی لانڈرنگ کیس میں عام آدمی پارٹی کے ایم ایل اے امانت اللہ خان کی پیشگی ضمانت کی عرضی کو مسترد کر دیا ہے۔ خصوصی جج راکیش سیال نے پیشگی ضمانت کی درخواست مسترد کرنے کا حکم دیا۔
عدالت نے 24 فروری کو فیصلہ محفوظ کر لیا تھا۔ سماعت کے دوران ای ڈی نے امانت اللہ کی پیشگی ضمانت کی درخواست کی مخالفت کی تھی اور کہا تھا کہ اگر امانت اللہ کو پیشگی ضمانت دی جاتی ہے تو وہ تحقیقات میں تعاون نہیں کریں گے۔ اس کا دعویٰ ہے کہ امانت اللہ نے مجرمانہ سرگرمیوں سے کافی دولت حاصل کی ہے اور اپنے ساتھیوں کے نام پر غیر منقولہ جائیدادیں خرید رکھی ہیں۔ چھاپے کے دوران کئی دستاویزات اور ڈیجیٹل شواہد ملے جن سے ظاہر ہوتا ہے کہ وہ منی لانڈرنگ کے جرم میں ملوث تھے۔
عدالت نے 19 فروری کو ای ڈی کو نوٹس جاری کیا تھا۔ 19 فروری کو امانت اللہ کی طرف سے پیش ہونے والے وکیل مینکا گروسوامی نے کہا تھا کہ منی لانڈرنگ کیس میں ای ڈی نے امانت اللہ خان کو نوٹس جاری کیا ہے۔ ایک ہی معاملے میں دو ایف آئی آر درج کی گئی ہیں۔ سی بی آئی نے پہلی ایف آئی آر 23 نومبر 2026 کو درج کی تھی۔ الزام ہے کہ امانت اللہ کو غلط طریقے سے دہلی وقف بورڈ کا چیئرمین مقرر کیا گیا تھا۔ سی بی آئی نے یہ کہہ کر کیس بند کر دیا کہ یہ انتظامی غلطی تھی۔
اس سے پہلے، 7 فروری کو، امانت اللہ نے دہلی ہائی کورٹ سے ای ڈی کے جاری کردہ سمن کو چیلنج کرنے والی درخواست واپس لے لی تھی۔
قابل ذکر ہے کہ راؤزایونیو کورٹ نے وقف بورڈ سے متعلق منی لانڈرنگ کیس میں ای ڈی کی چارج شیٹ کا نوٹس لیا ہے۔ ای ڈی نے 9 جنوری کو چارج شیٹ داخل کی تھی۔ تقریباً پانچ ہزار صفحات کی چارج شیٹ میں ای ڈی نے جاوید امام صدیقی، داؤد ناصر، کوثر امام صدیقی اور ذیشان حیدر کو ملزم بنایا ہے۔ ای ڈی نے پارٹنرشپ فرم اسکائی پاور کو بھی ملزم بنایا ہے۔
ای ڈی کے مطابق یہ معاملہ 13.40 کروڑ روپے کی زمین کی فروخت سے متعلق ہے۔ امانت اللہ کی نامعلوم ذرائع سے حاصل کی گئی دولت سے زمینیں خریدی اور فروخت کی گئیں۔ ملزم کوثر امام صدیقی کی ڈائری میں 8 کروڑ روپے کی انٹری ہوئی ہے۔ جاوید امام نے یہ جائیداد سیل ڈیڈ کے ذریعے حاصل کی۔ جاوید امام نے یہ جائیداد 13.40 کروڑ روپے میں فروخت کی۔
اس معاملے میں سی بی آئی نے پہلے کیس درج کیا تھا۔ سی بی آئی کی جانب سے درج مقدمے میں امانت اللہ سمیت 11 ملزمان کو نامزد کیا گیا ہے۔ سی بی آئی نے 23 نومبر 2016 کو ایف آئی آر درج کی تھی۔ جانچ کے بعد سی بی آئی نے 21 اگست 2022 کو چارج شیٹ داخل کی۔ سی بی آئی کے مطابق دہلی وقف بورڈ کے سی ای او اور دیگر کنٹریکٹ پر تقرریوں میں بے ضابطگیاں کی گئیں۔
سی بی آئی کی چارج شیٹ میں کہا گیا ہے کہ ان تقرریوں کے لیے امانت اللہ نے محبوب عالم اور دیگر ملزمان کے ساتھ مل کر سازش کی، جنہیں وقف بورڈ میں مختلف عہدوں پر تعینات کیا گیا تھا۔ یہ تقرریاں من مانی کی گئیں اور امانت اللہ اور محبوب عالم نے اپنے عہدوں کا غلط استعمال کیا۔