لکھنؤ :(پریس ریلیز)
سوشل ڈیموکریٹک پارٹی آف انڈیا ( ایس ڈی پی آئی) کے ریاستی دفتر سے جاری ایک پریس ریلیز میں ضلع سدھارتھ نگر پولیس کے ذریعہ گاؤں کونڈکارا ٹولہ ،اسلام نگر میں عبدالرحمٰن کی والدہ کو گولی مارنے کے واقعہ ھر سخت برہمی کا اظہار کیا ہے۔ ریاستی صدر ڈاکٹر نظام الدین خان نے کہا ہے کہ اطلاعات کے مطابق سدھارتھ نگر کی پولیس ٹیم 14مئی کی رات تقریباً 10بجے عبدالرحمٰن ولد اکبر علی ساکن گاؤں کونڈار ٹولہ ،اسلام نگر ،تھانہ اور ضلع سدھارتھ نگر کے گھر پہنچی اور اس کی تلاشی لی اور اسے اپنے قبضے میں لے لیا۔ عبدالرحمٰن کی ماں روشنی نے پولیس کو اسے لے جانے سے روکنے کی کوشش کی جس پر پولیس اہلکاروں نے اسے دھکا دیا۔ اس کے بعد عبدالرحمٰن کی والدہ اپنے بیٹے سے لپٹ گئیں اور پولیس اہلکار اسے گھسیٹتے رہے اور پولیس اہلکاروں نے عبدالرحمٰن کے والدہ روشنی کو گولی مار دی جس سے وہ جاں بحق ہوگئیں۔
سوشل ڈیموکریٹک پارٹی آف انڈیا اس گھناؤ نے جرم کی سختی سے مخالفت کرتی ہے اور اس کی شدید مذمت کرتی ہے ۔ ڈاکٹر نظام الدین نے مزید کہاکہ اس وقعہ سے پتہ چلتا ہے کہ اترپردیش میں امن وامان ختم ہو گیا ہے اور پولیس راج چل رہاہے ۔ سدھارتھ نگر پولیس کے اس شدید جرم کے سلسلے میں ایس ڈی پی آئی کامطالبہ ہے کہ اس واقعے میں ملوث تمام پولیس اہلکاروں کو فوری طور پر گرفتار کیا جائے اور اس واقعہ کی اعلیٰ سطحی عدالتی انکوائری کرائی جائے اورمتاثرہ خاندان کو پچاس لاکھ روپے کامعاوضہ دیاجائے۔
ایس ڈی پی آئی ریاستی صدر نے کہاکہ پارٹی کے ریاستی جنرل سکریٹری معید ہاشمی کی قیادت میں ایس ڈی پی آئی کاایک وفد متاثرہ خاندان سے ملاقات کرے گا اور حقیقت کے بارے میں جانکاری حاصل کرے گا۔ اس کے ساتھ ہی ایس ڈی پی آئی کی جانب سے اترپردیش کے تمام ضلعی پیڈکوارٹرس پر احتجاجی مظاہرے بھی کئے جائیں گے ۔ جس کے لئے ایس ڈی پی آئی کی تمام ضلع اکائیوں کو ہدایات جاری کردی گئی ہیں ۔
