دہشت گردوں کے ساتھ ایس پی کی ہمدردی:یوگی

مین پوری:(ایجنسی)

وزیر اعلی یوگی آدتیہ ناتھ نے مین پوری کے کرہل اسمبلی حلقہ میں ایک انتخابی ریلی سے خطاب کیا۔ اس دوران انہوں نے اکھلیش یادو پر سخت نشانہ لگایا۔ سماج وادی پارٹی کو دہشت گردوں کا حامی بتانے سے لے کر ملائم سنگھ یادو اور شیو پال سنگھ یادو تک کا ذکر کیا۔ وزیر اعلیٰ نے کہا کہ اکھلیش یادو کرہل سے الیکشن ہار رہے ہیں، اس لیے بوکھلاہٹ میں وہ بی جے پی کے امیدوار پروفیسر ایس پی بگھیل پر حملے کروا رہے ہیں۔

بلڈوزر مرمت کے لیے بھیجا ہے، 10 مارچ کے بعد دوبارہ چلے گا

سماج وادی پارٹی (ایس پی) پر دہشت گردوں کے مقدمات واپس لینے کا الزام لگاتے ہوئے اتر پردیش کے وزیر اعلیٰ یوگی آدتیہ ناتھ نے طنز کیا ہے کہ بلڈوزر کو انتخابات کے دوران مرمت کے لیے بھیجا گیا ہے جس کا استعمال 10 مارچ کے بعد جرائم پیشہ عناصر اور بدمعاشوں کو سبق سکھانے کے لیے کیا جائے گا۔

تیسرے مرحلے کی انتخابی مہم کے آخری دن جمعہ کے روز کرسچن اسکول کے کھیل کے میدان میں ایک انتخابی میٹنگ سے خطاب کرتے ہوئے یوگی نے کہا کہ ’’پہلے بڑے مافیا اور غنڈے اقتدار چلاتے تھے۔ آج وہ سب جیل کے اندر ہیں۔ زندگی کی بھیک مانگ رہے ہیں۔ سماج وادی پارٹی کے سینئر لیڈر مجھ سے پوچھ رہے تھے کہ کیا انتخابات کے دوران بلڈوزر نہیں چلے گا۔ میں نے کہا کبھی کبھی بلڈوزر کو بھی آرام کی ضرورت ہوتی ہے۔ اسے مرمت کے لیے بھیج دیا گیا ہے۔ الیکشن میں مافیا- غنڈے بل سے باہر نکل آئے ہیں۔ 10 مارچ کے بعد بلڈوزر پھر سے چلے گا۔

انہوں نے کہا کہ سماج وادی حکومت نے 2012 میں اقتدار میں آنے کے بعد سب سے پہلا کام دہشت گردوں کے مقدمات کو واپس لینے کا کام کیا تھا۔ ان کی ہمدردی کسان نوجوان کے ساتھ نہیں تھی۔ روزگار اور تحفظ کے لئے نہیں تھی۔ ترقی کے لیے نہیں تھی۔ سماج وادی کی ہمدردی ایودھیا میں رام جنم بھومی پر حملہ کرنے والوں کے ساتھ تھی۔ یہی وجہ ہے کہ حکومت میں آتے ہی انہوں نے سب سے پہلے ایودھیا، کاشی مندروں، وارانسی، لکھنؤ اور رام پور میں دہشت گردانہ حملے کرنے والے دہشت گردوں کا مقدمہ واپس لے لیا۔ اسی وقت جب بی جے پی کی حکومت آئی تو سب سے پہلے ہم نے کسانوں کے لیے قرض معافی کا فیصلہ لیا۔

آسمان سے ٹپکے اورکھجور پر اٹکے:

وزیر اعلیٰ نے کہا، جب کرہل سے ایس پی امیدوار کاغذات نامزدگی داخل کرنے آئے تھے تو انہوں نے کہا تھا کہ اب میں صرف سرٹیفکیٹ لینے آؤں گا، لیکن پروفیسر ایس پی بگھیل جی نے انہیں پانچ دن میں بلا لیا۔ وہ بے چین ہیں۔ ان کی حالت ایسی ہو گئی ہے جو آسمان سے ٹپکے اور کھجور پر اٹکے والی ہوگئی ہے۔ اعظم گڑھ سے وہ ممبرپارلیمنٹ منتخب ہوئے تھے،لیکن کورونا کےوقت وہ ایک بار بھی اعظم گڑھ نہیں گئے۔ ان کو لگا کہ نیتا جی کی وراثت کو ہتھیالوں۔

شیو پال کو بیٹھنے کے لیے کرسی تک نہیں ملی:

یوگی نے شیو پال سنگھ یادو کا ذکر کرتے ہوئے اکھلیش پر بھی طنز کیا۔ کہا، بے چارے شیو پال، جو ریاست میں وزیر تھے، کو یہاں جلسہ عام میں بیٹھنے کے لیے کرسی بھی نہیں ملی۔ مجھے ہنسی آرہی تھی۔ کہاں یہ ریاست بھر میں ہزاروں لوگوں کے ساتھ گھومتے تھے۔ وہ نیتا جی کے کمانڈر کے طور پر جانے جاتے تھے۔ آج انہیں بیٹھنے کے لیے کرسی کا بازو ملتا ہے۔ اگر آپ کسی کی حالت زار دیکھنا چاہتے ہیں تو شیو پال سنگھ یادو اس کی زندہ مثال ہیں۔

نیتا جی ان کا نام بھی نہیں لینا چاہتے:

یوگی نے کہا، نیتا جی کل آئے تھے۔ وہ بہت ہوشیار ہیں۔ وہ جانتے ہیں کہ کرہل کے لوگوں نے فیصلہ کر لیا ہے کہ پروفیسر ایس پی سنگھ بگھیل ان کے لیڈر ہوں گے… چنانچہ نیتا جی نے کل یہی کہا تھا۔ ٹھیک ہے… تم لوگ جو چاہو فیصلہ کرو۔ اپنے ایم ایل اے کا انتخاب کریں۔ دوسرے پیچھے سے بار بار کہہ رہے ہیں کہ نام لو اور لیڈر پوچھ رہا ہے کہ یہاں سے کون لڑ رہا ہے؟ اب یہ بدقسمتی ہو گئی ہے کہ باپ بیٹے کا نام نہیں جانتا۔ اس سے ایس پی کی بدقسمتی ظاہر ہوتی ہے۔

مین پوری کی چاروں سیٹوں پر بی جے پی جیتے گی:

وزیر اعلیٰ یوگی نے کہا کہ بی جے پی فیروز آباد اور اٹاوہ اضلاع کی تمام سیٹیں جیت رہی ہے، پھر وہ مین پوری سے بھی جیتے گی۔ بانکے بہاری لال نے یہی حکم دیا ہے کہ اگر آپ مین پوری کے بعد کرہل جائیں گے تو چاروں سیٹیں بی جے پی کی ہوں گی۔ وزیر اعلیٰ یوگی نے عوام سے اپیل کی کہ وہ ضلع کی چاروں سیٹوں سے بی جے پی کے امیدواروں کو جتوائیں۔ اس کے بعد وہ کرہل روانہ ہو گئے۔