سسپنس ختم،پرینکا نہیں لڑیں گی ،راہل رائے بریلی سے  قسمت آزمائیں گے،کانگریس نے امیٹھی سے کے ایل شرما کو اتارا

کانگریس نے لوک سبھا انتخابات کے لیے اتر پردیش کی امیٹھی اور رائے بریلی سیٹوں کے لیے اپنے امیدواروں کا اعلان کر دیا ہے۔ سسپنس کو ختم کرتے ہوئے کانگریس نے نامزدگی کی تاریخ کے آخری دن دونوں سیٹوں پر اپنے امیدواروں کے ناموں کا اعلان کیا۔ کانگریس کے سابق صدر راہل گاندھی رائے بریلی سے اور کشوری لال شرما امیٹھی سے الیکشن لڑیں گے۔ اس کے ساتھ ہی پرینکا گاندھی کے رائے بریلی یا امیٹھی سے الیکشن لڑنے کی قیاس آرائیاں بھی ختم ہوگئیں
کشور لال شرما کون ہیں؟
معلومات کے مطابق کشور لال شرما طویل عرصے سے گاندھی خاندان کے وفادار رہے ہیں اور رائے بریلی میں سونیا گاندھی کے حلقے کے نمائندے رہ چکے ہیں۔ منٹ کی رپورٹ کے مطابق شرما صبح 10 بجے اپنا پرچہ نامزدگی داخل کریں گے۔ نامزدگی کے دوران شرما کے ساتھ پرینکا گاندھی واڈرا بھی موجود رہیں گی۔اس دوران راہل  کے دوپہر 12 بجے تک کاغذات نامزدگی داخل کرنے کی امید ہے۔ ان کی والدہ سونیا گاندھی بھی ان کے ساتھ ہوں گی۔
دونوں سیٹوں کے لیے انتخابات پانچویں مرحلے میں یعنی 20 مئی کو ہونے ہیں۔
کون کس کے سامنے؟
امیٹھی میں کشوری لال شرما کا مقابلہ بی جے پی رہنما اور مرکزی وزیر اسمرتی ایرانی اور بی ایس پی کے روی پرکاش موریہ سے ہے، جب کہ رائے بریلی میں یوپی حکومت کے وزیر دنیش پرتاپ سنگھ اور بی ایس پی کے ٹھاکر پرساد یادو راہل گاندھی کے خلاف میدان میں ہیں۔ یوپی میں سماج وادی پارٹی نے کانگریس کے ساتھ اتحاد میں کوئی امیدوار کھڑا نہیں کیا ہے۔