رامپور :(آر کے بیورو )
سماج وادی پارٹی کے قدآور لیڈر ،رام پور سے نومنتخب ایل ایل اے محمد اعظم خاں، جو یوپی کی سیتا پور جیل میں بند ہیں، آج اتر پردیش اسمبلی میں ایم ایل اے کے طور پر حلف نہیں لے سکیں گے۔ عدالت نے جیل انتظامیہ کی جانب سے دی گئی درخواست کو مسترد کر دیا ہے، جس میں انہیں اسمبلی میں حلف برداری کے لیے لے جانے کی اجازت مانگی گئی تھی۔ اعظم خاں کو اس کی اجازت نہیں دی گئی۔ اعظم خاں رام پور اسمبلی سیٹ سے ایم ایل اے منتخب ہوئے ہیں جس کے بعد انہوں نے رام پور کی لوک سبھا سیٹ سے استعفیٰ دے دیا ہے۔
یوپی اسمبلی کے انتخابات میں جیتنے والے تمام 403 نو منتخب ایم ایل ایز کو عہدہ اور رازداری کا حلف دلایا جا رہا ہے۔ سب سے پہلے پیر کو سی ایم یوگی آدتیہ ناتھ نے اسمبلی میں ایم ایل اے کے طور پر عہدے اور رازداری کا حلف لیا، جس کے بعد ایس پی صدر اور اپوزیشن لیڈر اکھلیش یادو کو بھی عہدے کا حلف دلایا گیا۔ پہلے دن 343 ایم ایل اے نے حلف لیا، اس کے بعد منگل کو بھی یہ سلسلہ جاری رہا۔
اعظم خاں کو بھی آج اسمبلی میں بطور ایم ایل اے حلف اٹھانے آنا تھا جس کے لیے جیل انتظامیہ نے عدالت سے اجازت طلب کی تھی تاکہ وہ اسمبلی میں جا کر حلف اٹھا سکیں۔ لیکن عدالت نے اجازت دینے سے انکار کر دیا ہے جس کی وجہ سے وہ اب اسمبلی میں نہیں جا سکیں گے۔
