مقامی سرکارجو کہے گی ٹوئٹر کو ماننا پڑے گا: ایلون مسک

ٹوئٹر کے شریک بانی اور سابق سی ای او جیک ڈورسی نے حال ہی میں ہندوستان سمیت دنیا کی دیگر حکومتوں کے دباؤ کا الزام لگایا تھا۔ آج کمپنی کے سربراہ ایلون مسک نے اس بارے میں کھل کر بات کی ہے۔ بھارتی میڈیا سے گفتگو کرتے ہوئے مسک نے کہا کہ ٹوئٹر کے پاس مقامی حکومتوں کی بات ماننے کے علاوہ کوئی آپشن نہیں ہے۔وزیراعظم نریندر مودی نے دورہ امریکا کے پہلے روز نیویارک میں ایلون مسک سے ملاقات کی۔ وزیراعظم سے ملاقات کے بعد ایلون مسک نے ان کی کھل کر تعریف کی۔ پریس سے بات کرتے ہوئے مسک نے کہا، ‘میں پی ایم مودی کا مداح ہوں۔’ مسک نے یہ بھی بتایا کہ وہ اگلے سال ہندوستان کا دورہ کریں گے۔
میڈیا سے گفتگو میں مسک نے واضح طور پر کہا کہ وہ پوری زمین پر امریکہ کے قوانین کا اطلاق نہیں کر سکتے۔ اگر ہم مقامی حکومت کے قوانین پر عمل نہیں کرتے ہیں تو ہمیں بند کر دیا جائے گا۔ اس کا بہترین حل یہ ہے کہ ہم کسی بھی ملک میں قانون کے مطابق کام کریں۔ اس سے زیادہ کرنا ہمارے لیے ناممکن ہے۔ ہم اظہار رائے کی آزادی فراہم کرنے کی پوری کوشش کریں گے۔ لیکن یہ مقامی قانون کے دائرے میں ہونا چاہیے۔