نئ دہلی:جمعیۃ علماء ہند کے چونتیسویں اجلاس عام کی تیاریوں کے سلسلے میں ایک اہم میٹنگ ہوئی جس میں اجلاس کے اغراض ومقاصد اور منظر، پس منظر پر صدر جمعیۃ علماء ہند مولانا محمود اسعد مدنی نے تفصیل سے روشنی ڈالی، اس میں دہلی اور لونی حلقہ کے تین سو ائمہ مساجد اور جمعیۃ سے وابستہ ذمے دار حضرات نے شرکت کی۔
اس موقع پرانہوں نے نے اپنےخصوصی خطاب میں کہا کہ ملک وملت کے سامنے ہمیشہ ایسے مسائل رہے ہیں جن پر اجتماعی غور و فکر کی ضرورت ہوتی ہے تاکہ ایک مستحکم او رپائیدار لائحہ عمل طے کر کے آگے بڑھا جائے ۔ موجودہ وقت میں ملت کے سامنے بہت سارے چیلنجز ہیں ، جن کا ہوش مندی سے حل نکالنا ضروری ہے ، لیکن مایوس ہونے اور بہت زیادہ فکر مندہونے کی چنداں ضرورت نہیں ہے ۔انھوں نے کہا کہ چند مخصوص عناصر ہمیں مایوس کرنا چاہتے ہیں ، لیکن ہم ہرگز مایوس نہیں ہونے والے ہیں اور نہ جھکنے والے ہیں ، ہمیں خود کے اندر اعتماد اور حوصلہ پیدا کرنا ہے اورہر طرح سے پرعزم رہنا ہے ۔
انھوں نے بتایا کہ جمعیۃ علماء ہند اپنی تاریخ اور روایات کے مطابق ۱۰، ۱۱، ۱۲، فروری کو رام لیلا میدان نئی دہلی میں اجلاس عام کررہی ہے۔ آئینی کمیٹیوں کے اجلاس کے بعد کھلا اجلاس عام ۱۲؍فروری بروز اتوار صبح نو بجے سے شروع ہوگا۔ یہ اجلاس ہماری سرگرمیوں کا صرف ایک حصہ ہے جہاں ہم مل کر فیصلہ کرتے ہیں اور آگے بڑھتے ہیں، اس لیے اجلاس کے بعد ہماری جد وجہد میں مزید تیزی آئے گی ۔
مولانا مدنی اس موقع پر ائمہ کرام سے اپیل کی کہ نئی نسل کو دین کی بنیادی تعلیم سے وابستہ کرنے کے مقصد سے ضرور مکاتب قائم کریں ۔ مولانا مدنی نے کہا کہ ہمارے سامنے دومسئلے ہیں ، ایک ہے کسی بھی بے قصور مسلمان کا قتل ہونا اور دوسرا مرتد ہونا ، زیادہ بڑا چیلنج مرتد ہونا ہے ، کیوں یہ اجتماعی معاملہ ہے ، اس لیے اس کو روکنے کے لیے دینی تعلیم کا فروغ انتہائی ناگزیر ہے ۔
مولانا حکیم الدین قاسمی ناظم عمومی جمعیۃ علماء ہند نے اپنے خطاب میں کہا کہ جمعیۃ علماء ہند تمام تحریکات کی محافظ جماعت ہے ، اس لیے اس جماعت کو مستحکم کرنا خود کو مستحکم کرنے کے مثل ہے ۔انھوں نے نیشنل جمبوری میں جمعیۃ یوتھ کلب کی کامیابیوں کا خاص طور سے تذکرہ کیا ۔انھوں نے ا ئمہ کرام سے اجلاس عام کو کامیاب بنانے کے لیے تعاون دینے اپیل کی ، جس پر ائمہ کرام نے تائید کی اور اپنی خدمات پیش کیں، اس سلسلے میں اجلاس کی تیاریوں کے تعلق سے دہلی و لونی میں متعدد کمیٹیاں تشکیل دی گئیں۔ازیں قبل جمعیۃ علماء ہند کی مختلف خدمات پر پاور پوائنٹ کے ذریعہ پرزینٹیشن پیش کیا گیا ۔ ماحولیات کی ماہرہ سعدیہ سہیل نے ماحولیات پر بذریعہ زوم پرزینٹیشن پیش کیا، اس موضوع سے متعلق تعارف جناب اویس سلطان خاں نے پیش کیا۔ دیگر اہم شرکاء میں سے مولانا داؤو د امینی ، مولانا اسلام الدین قاسمی ، قاری عبدالسمیع ، مولانا فاروق مظہر اللہ ، مولانا محب اللہ قاسمی، مولانا اخلاق قاسمی مصطفی آباد، مفتی ذکاوت حسین، حاجی محمد یوسف، مفتی حسام الدین ،حاجی محمد آزاد رکن جماعت تبلیغ،دائود بھائی شیووہار، مولانا عبدالسبحان قاسمی ، حاجی نسیم الدین ، مولانا زاہد، حاجی اسعد میاں، مولانا شمیم قاسمی ذاکر نگر، قاری ربیع الحسن ، قاری عاشق، مفتی خبیب، مولانا عبدالکریم ، مولانا ارشاد، مفتی افسر، مولانا ولی اللہ سندر نگری، مولانا یوسف، ماسٹرنثار احمد، مفتی حفظ الرحمن، مولانا عبدالباسط ، مولانافرقان سمے پور بادلی، مولانا محمد، مولانا یوسف وزیر آباد، لونی سے قاری محمد نواب ، مفتی حسن، قاری عرفان ، مولانا جناب الدین، مولانا ناظم اشرف قاسمی، مفتی خلیل، مولانا آصف محمود ،قاری احرار، مولانا رضوان قاسمی، قاری ارشاد بوانہ ، مولانا ارشد ندوی وغیرہ شامل ہیں ۔مجلس کا آغازقاری محمد فاروق کی تلاوت سے ہوا جب کہ نعت مولانا حارث نے پیش کی ۔
