ممبئی:(ایجنسی)
مہاراشٹر حکومت لاؤڈ اسپیکر کے معاملے پر سرگرم ہوگئی ہے۔ ذرائع کے مطابق مہاراشٹر کے تمام مذہبی مقامات پر لاؤڈ اسپیکر لگانے سے پہلے اب حکومت کی اجازت درکار ہوگی۔ بغیر اجازت لاؤڈ سپیکر استعمال کرنے والوں کے خلاف کارروائی کی جائے گی۔ مہاراشٹر کے وزیر داخلہ دلیپ والسے پاٹل لاؤڈ اسپیکر کے معاملے پر مہاراشٹر کے ڈی جی پی کے ساتھ میٹنگ کریں گے۔ تمام پولیس کمشنروں اور افسروں سے میٹنگ کر کے انہیں حکم دیا جا سکتا ہے۔ وزیر داخلہ دلیپ والسے پاٹل کی جانب سے کہا گیا ہے کہ ریاست کے ڈی جی پی تمام پولیس کمشنروں کے ساتھ لاؤڈ اسپیکر کے معاملے پر بات کریں گے اور ایک گائیڈ لائن تیار کرکے سب کو دی جائے گی۔ کسی کو بھی ریاست میں امن و امان خراب کرنے کی اجازت نہیں دی جائے گی۔
ناسک پولیس کمشنر نے حکم دیتے ہوئے کہا ہے کہ 3 مئی تک تمام مذہبی مقامات پر لاؤڈ اسپیکر لگانے سے پہلے اجازت لینی ہوگی۔ تمام مذہبی مقامات میں مندر، گرودوارے، مساجد، چرچ وغیرہ شامل ہیں۔ لاؤڈ اسپیکر لگانے کے لیے ہر کسی کو تحریری اجازت لینا ہوگی۔ پولیس کمشنر آفس سے تحریری اجازت لینے کے بعد ہی مذہبی مقامات پر لاؤڈ اسپیکر لگائے جاسکتے ہیں۔ 3 مئی کے بعد کسی بھی مذہبی مقام پر بغیر اجازت لاؤڈ اسپیکر لگانے پر پولیس کی جانب سے کارروائی کی جائے گی اور لاؤڈ اسپیکر کو ضبط کرکے کارروائی کی جائے گی۔
بتادیں کہ مہاراشٹر نو نرمان سینا (ایم این ایس) کے سربراہ راج ٹھاکرے نے ریاستی حکومت کو مساجد سے لاؤڈ اسپیکر ہٹانے کا الٹی میٹم دیا ہے۔ راج ٹھاکرے نے حکومت کو 3 مئی تک کا الٹی میٹم دیا ہے کہ اگر مساجد سے لاؤڈ اسپیکر نہیں ہٹائے گئے تو ملک بھر کی مساجد کے سامنے ہنومان چالیسا بجائی جائے گی۔
دوسری جانب راج ٹھاکرے نے کل صحافیوں کی کونسل میں کہا تھا کہ لاؤڈ اسپیکر کا موضوع سماجی ہے، مذہبی نہیں اور اسے اسی نقطہ نظر سے دیکھنا چاہیے، اسی لیے ہم نے فیصلہ کیا ہے کہ اگر آپ 5 بار لاؤڈ اسپیکر استعمال کریں گے تو ہم دن میں 5 بار مسجد کے سامنے ہنومان چالیسا بھی پڑھیں گے۔ مجھے لگتا ہے کہ کچھ چیزیں ہمیں خود سمجھنی چاہئیں۔ مسلم سماج کو بھی سمجھنا چاہئے کہ ان کا مذہب اس ملک سے بڑا نہیں ہو سکتا، لوگ تکلیف میں ہیں، انہیں یہ سمجھنے کی ضرورت ہے۔
