اردو کے پہلے شہید صحافی مولوی باقر کی تصویر پریس کلب آف انڈیا میں لگائی گئی

نئی دہلی:پریس کلب آف انڈیا نے اردو کے پہلے شہید صحافی مولوی باقر کی یاد میں پریس کلب میں مولوی باقر کی تصویر کی نقاب کشائی کی 
اس موقع پر ایک باوقار تقریب منعقد کی گئی جس میں شریک سرکردہ شخصیات نے مولوی باقر کی صحافتی خدمات پر گفتگو کی. پریس کلب آف انڈیا کے صدر گوتم لہری نے پروگرام کی صدارت کی۔
مولوی محمد باقر کے خاندان کی علی گڑھ مسلم یونیورسٹی کی عذرا موسوی اور ترانہ حسین  کی شرکت نے تقریب کو چار چاند لگا دیے  
اس موقع پر سینئر جرنلسٹ اے یو آصف نے اس تقریب کا تعارف کراتے ہوئے اس کی اہمیت اور افادیت پر بھر پور روشنی ڈالی مولوی باقر کی قربانیوں کو یاد کرتے ہوئے انہوں نے کہا کہ مولانا باقر نے ہندوستانی عوام کو انگریزی حکومت کے ظلم سے نجات دلانے کے لیے جو کام کیا ہے تاریخ میں سنہری حروف میں درج ہو گئے ہیں. پریس کلب آف انڈیا کے ہال میں ان کی تصویر  لگانا اہم کارنامہ ہےتاکہ نئی نسل کے جرنلسٹوں کے ذہنوں میں آزادی کے اس ہیرو کی قربانی کی داستان تازہ رہے
 تقریب کے مہمان خصوصی  جے ڈی یو کے قومی ترجمان سابق ممبر پارلیمنٹ کے سی تیاگی نے مولوی باقر کو یاد کرتے ہو ئے آج کے ہندوستان میں ان کی صحافت کی ضرورت بتایا. تیاگی نے کہا ایسے لوگ صدیوں میں پیدا ہوتے ہیں
صدر مجلس پریس کلب آف انڈیا کے موجودہ صدر گوتم لہری نے کہا ہمیں خوشی ہے کہ آج ہم آزادی کے ایک بڑے ہیرو مولوی باقر کو یاد کر رہے ہیں، پریس کلب نے گزشتہ برسوں میں اردو صحافت کو کافی جگہ دی ہے، ہمیشہ اردو صحافیوں کی حوصلہ افزائی کی ہے، اردو صحافی کسی سے کم نہیں ہیں، پریس کلب سے وابستہ ہوکر متحرک ہوکر کام کریں ہم ان کا تہہ دل سےاستقبال کرتے ہیں
معروف مورخ رعنا صفوی نے کہا کہ وہ ہندو مسلم اتحاد کی زندہ مثال تھے، انگریزوں کے پھوٹ ڈالو اور راج کرو کی سازش کو ناکام بنانے کیلئے جان کی بازی لگادی
کانگریس لیڈر ہدایت اللہ جینٹل نے کہا، مشکلات کا سامنا کیسے کرنا ہے یہ مولوی باقر کی شہادت سے سیکھا جا سکتا ہے،. اس موقع پر سینئر جرنلسٹ سہیل انجم اور روزنامہ ہمارا سماج کے ایڈیٹر شعیب رضا فاطمی نے بھی اپنے خیالات کا اظہار کیا 
 پروگرام کے اخیر میں پریس کلب آف انڈیا کی مینیجنگ کمیٹی کے رکن اشرف علی بستوی نے تمام شرکاء کا شکریہ ادا کیا