سپریم کورٹ نے چرچوں پر حملے کی رپورٹ طلب کرلی

نی دہلی سپریم کورٹ نے مسیحی برادری اور ان کے چرچ پر حملوں کے حوالے سے حکومتی بیان کو نظر انداز کردیا۔ سپریم کورٹ نے جمعرات کو وزارت داخلہ سے کہا کہ وہ کئی ریاستوں بشمول اتر پردیش، مدھیہ پردیش، ہریانہ، کرناٹک، اڈیشہ، چھتیس گڑھ اور جھارکھنڈ سے عیسائی اداروں پر حملوں کے بارے میں رپورٹ طلب کرے، جیسا کہ ایک PIL میں الزام لگایا گیا ہے۔ دو ہفتے قبل ہونے والی سماعت میں حکومت نے ایسی رپورٹ کو غلط قرار دیا تھا۔ لیکن اس دوران دو روز قبل پنجاب میں چرچ پر حملے کی خبر آئی۔جسٹس ڈی وائی چندرچوڑ اور جسٹس ہیما کوہلی نے کہا کہ کسی پر حملہ کا مطلب یہ نہیں ہے کہ یہ اس کی برادری پر حملہ ہے۔ لیکن اگر اسے مفاد عامہ کی عرضی (PIL) میں اٹھایا جاتا ہے تو اس طرح کے کسی بھی واقعے کے دعووں کی تصدیق کی ضرورت ہے۔سالیسٹر جنرل تشار مہتا نے کہا کہ تصدیق کرنے پر پتہ چلا ہے کہ پی آئی ایل میں زیادہ تر مبینہ کیس جھوٹے ہیں اور ویب پورٹل پر شائع ہونے والے ایک مضمون پر مبنی ہیں۔ انہوں نے کہا کہ عدالت ایسی مفاد عامہ کی درخواست میں حکم نہ دے ورنہ پنڈورا باکس کھل جائے گا۔بنچ نے وزارت داخلہ کو ریاستوں سے رپورٹ طلب کرنے کے لیے دو ماہ کا وقت دیا۔ عدالت نے کہا کہ عدالت کو صرف اس بات کی فکر ہے کہ اس طرح کے واقعات کی رپورٹنگ اور نگرانی کے لیے نوڈل افسروں کی تقرری سے متعلق اس کے پہلے فیصلوں پر ریاستیں عمل کر رہی ہیں۔