اقوام متحدہ کی انسانی حقوق کمیٹی کا بھارت میں اقلیتوں کے ساتھ امتیازی سلوک پراظہار تشویش

نئی دہلی: اقوام متحدہ کی انسانی حقوق کمیٹی (یو این ایچ آر سی) نے ہندوستان میں اقلیتوں کے خلاف امتیازی سلوک اور تشدد پر تشویش کا اظہار کیا ہے۔ اس نے کہا ہے کہ ہندوستان کا رویہ شہری اور سیاسی حقوق کے بین الاقوامی کنونشن (ICCPR) معاہدے کے مطابق نہیں ہے۔ آئی سی سی پی آر کی نگرانی کرنے والے آزاد ماہرین کی تنظیم اقوام متحدہ کی انسانی حقوق کمیٹی نے جمعرات (25 جولائی) کو بھارت کی جانب سے معاہدے کی تعمیل پر اپنی رپورٹ جاری کی۔
ہندوستان کو اب تک تین بار آئی سی سی پی آر کا جائزہ لینا پڑا ہے، آخری جائزہ 1997 میں ہوا تھا۔ ہندوستان نے 1979 میں آئی سی سی پی آر میں شمولیت اختیار کی۔ چوتھا جائزہ تقریباً دو ہفتے قبل ہوا۔ بھارتی وفد کی قیادت اٹارنی جنرل آر۔ وینکٹرامانی اور سالیسٹر جنرل تشار مہتا نے کیا۔ 15 اور 16 جولائی کو دو دن تک ہندوستانی وفد نے UNHRC کے ساتھ بات چیت کی۔
وزارت خارجہ کے پریس نوٹ می  کہا گیا، ‘بات چیت کے دوران، انسانی حقوق کمیٹی کے اراکین نے ہندوستان کی روایات اور اخلاقیات کی تعریف کی، جن کی جڑیں تکثیریت، عدم تشدد اور تنوع جیسے اصولوں پر ہیں۔’
25 جولائی کو، جائزہ میٹنگ کے دس دن بعد، UNHRC نے ایک رپورٹ شائع کی جس میں ہندوستان کے نفاذ کے بارے میں اپنے نتائج کا خاکہ پیش کیا گیا۔ رپورٹ میں حکومت ہند کی طرف سے کچھ قانون سازی کی پیش رفت کا اعتراف کیا گیا ہے، لیکن رپورٹ بنیادی طور پر ‘تشویش کے کلیدی شعبوں’ اور ‘سفارشات’ پر مرکوز ہے۔جن خدشات کو اجاگر کیا گیا ہے ان میں سے ایک یہ ہے کہ ہندوستان کے قومی انسانی حقوق کمیشن کو 2023 سے قومی انسانی حقوق کے اداروں کے عالمی اتحاد سے ‘A’ زمرہ کا درجہ نہیں ملا ہے۔ اس کا مطلب یہ ہے کہ ملک انسانی حقوق کے میدان میں اچھا کام نہیں کر رہا ہے اور اس وجہ سے اسے اعلی درجہ بندی (جیسے A)نہیں مل رہی ہے
رپورٹ کے آخر میں کمیٹی نوٹ کرتی ہے کہ کمیٹی انسانی حقوق کی خلاف ورزیوں کی تحقیقات میں پولیس افسران کی شمولیت کے بارے میں فکر مند ہے۔ اس سے انسانی حقوق کمیشن کی آزادی متاثر ہو رہی۔
رپورٹ کے ایک بڑے حصے میں بھارت میں اقلیتوں کی صورتحال پر تشویش کا اظہار کیا گیا ہے۔
اس میں لکھا گیا ہے، ‘کمیٹی مذہبی اقلیتوں کے خلاف بڑھتے ہوئے تشدد جیسے کہ مئی 2023 سے منی پور کے واقعات بشمول ماورائے عدالت ہلاکتوں کے بارے میں فکر مند ہے۔ ۔
اس کے علاوہ رپورٹ میں ‘مذہبی اقلیتوں کی عبادت گاہوں اور گھروں کو مسمار کرنے، مسلمانوں اور عیسائیوں کے خلاف گؤ رکھشکوں کے تشدد اور 2022 کے رام نومی جلوس کے دوران فسادات کے بعد لنچنگ کے واقعات’ پر بھی تشویش کا اظہار کیا گیا ہے۔ رپورٹ میں خاص طور پر گائے کے محافظوں کے تشدد اور لنچنگ کو غیر قانونی بنانے کا قانون بنانے کی سفارش کی گئی ہے۔
کمیٹی نے مذہبی اقلیتوں کو نشانہ بنانے کے لیے قومی سلامتی اور انسداد دہشت گردی کے قوانین کے استعمال اور اقلیتوں کے خلاف نفرت انگیز تقاریر اور عوامی تشدد کو ہوا دینے والے سیاست دانوں کی رپورٹس کے بارے میں بھی اپنے تحفظات کو اجاگر کیا۔
رپورٹ میں تارکین وطن مخالف نفرت انگیز تقاریر پر تشویش کا اظہار کیا گیا ہے، جو تیزی سے پرتشدد ہوتی جا رہی ہے۔۔
کمیٹی نے ہندوستان پر زور دیا کہ وہ معاہدے کے تحت اپنی ذمہ داریاں پوری کرے اور اس بات کو یقینی بنائے کہ ان علاقوں میں انسداد دہشت گردی کی کارروائیاں اور دیگر حفاظتی اقدامات عارضی، متناسب اور عدالتی نظرثانی کے تابع ہوں۔ مزید برآں، اس نے بھارت سے مطالبہ کیا کہ وہ ذمہ داری قبول کرے اور ان علاقوں میں انسانی حقوق کی خلاف ورزیوں کے بارے میں سچائی سے پردہ اٹھانے کے لیے ایک طریقہ کار قائم کرے۔