(نوٹ :نیوز پورٹل دی کوئنٹ نے دہلی فساد کے چار سال پورے ہونے پر کچھ اہم مقدمات کی پیش رفت کا جائزہ لیا ہے جو سسٹم کی سست روی اور انصاف میں تاخیر پر روشنی ڈالتا ہے ۔یہ کافی طویل ہے ۔ہم دی کوئنٹ کے شکریہ کے ساتھ قسط وار قارئین کی خدمت میں پیش کررہے ہیں یہ تیسری اور آخری قسط ہے یہ اندازہ لگانا مشکل نہیں کہ ایک طرف عمر قید کاٹنے والے ریپسٹ اور قاتل مجرموں کو “اچھے سنسکار “کی وجہ سے قبل از وقت رہائی اور پیرول میں کو ئی مشکل نہیں آتی اور دوسری طرف ملزم معقول وجوہات کے باوجود سالوں ضمانت کے لئے ترس رہے ہیں ۔(تصویر بشکریہ بار اینڈ بینچ)
*شاداب احمد، عمر- 29: کمپیوٹر گریجویٹ
دہلی میں فیکٹری سپروائزر کے طور پر کام کرنے والے شاداب احمد کو 20 مئی 2020 کو گرفتار کیا گیا تھا اور تب سے وہ جیل میں ہیں۔ گزشتہ سال دسمبر میں، انہوں نے طبی بنیادوں پر کم از کم 90 دن کے لیے عبوری ضمانت کی درخواست کی تھی۔ لیکن عدالت نے پایا کہ ان کو”جیل میں ٹی بی کا مناسب علاج” دیا جا رہا ہے اور ان کی ضمانت کی درخواست مسترد کر دی۔ وہ 1,373 دن جیل میں گزار چکے ہیں۔
*سلیم خان، عمر- 50: گارمنٹ ایکسپورٹ یونٹ کے مالک
سلیم خان اسی علاقے میں گارمنٹ ایکسپورٹ یونٹ کے مالک ہیں جہاں فسادات پھوٹ پڑے تھے۔ انہیں 13 مارچ 2020 کو گرفتار کیا گیا تھا۔ ان کی ضمانت کی درخواست دو سال بعد ٹرائل کورٹ نے مسترد کر دی تھی۔ پچھلے سال نومبر میں بنچ میں تبدیلی کے بعد دہلی ہائی کورٹ ان کی ضمانت کی عرضی پر نئے سرے سے سماعت کر رہی ہے۔
سلیم خان تقریباً 1400 دنوں سے جیل میں ہیں، سوائے 21 نومبر 2023 کو دی گئی دو ہفتوں کی عبوری ضمانت کے، تاکہ ان کی بیٹی کو ڈینٹل کلینک شروع کرنے میں مالی مدد کی جا سکے۔
*جن کی ضمانتیں ہو چکی ہیں…
موبائل سیلز مین محمد فیضان خان کو 29 جون 2020 کو گرفتار کیا گیا، چار ماہ بعد ضمانت پر رہا کیا گیا۔
*جامعہ ملیہ اسلامیہ کی طالبہ کارکن صفورا زرگر کو 13 اپریل 2020 کو گرفتار کیا گیا تھا اور ان انسانی بنیادوں پر تقریباً دو ماہ بعد ضمانت مل گئی تھی، کیونکہ وہ اس وقت چھ ماہ کی حاملہ تھیں۔
*کانگریس کی سابق کونسلر اور وکیل عشرت جہاں کو 21 مارچ 2020 کو گرفتار کیا گیا تھا اور دو سال جیل میں گزارنے کے بعد انہیں سیشن کورٹ نے ضمانت دے دی
*جے این یو ریسرچ اسکالر اور صنفی کارکن ‘پنجرا توڑ’ کی شریک بانی نتاشا نروال اور دیونگنا کلیتا کو ایک سال سے زیادہ جیل میں گزارنے کے بعد 15 جون 2021 کو دہلی ہائی کورٹ نے ضمانت دی تھی۔
*جامعہ ملیہ اسلامیہ کے سابق طالب علم کارکن اور اسٹوڈنٹس اسلامک آرگنائزیشن آف انڈیا کے رکن آصف اقبال تنہا کو 19 مئی 2020 کو گرفتار کیا گیا تھا۔ انہیں تقریباً 13 ماہ بعد دہلی ہائی کورٹ نے ضمانت دی تھی۔
(نوٹ: جیل میں گزارے گئے دنوں کی گنتی ڈیٹ کیلکولیٹر ایپ کی مدد سے کی گئی ہے۔)
