یو پی:پندرہ ہزار دلتوں کی دھرم پریورتن کی دھمکی

لکھنؤ ؍ہمیر پور :(ایجنسی)

اتر پردیش کے ہمیر پور ضلع میں تقریباً 15 ہزار دلتوں نے ہندو مذہب چھوڑ کر بدھ مت اختیار کرنے کی دھمکی دی ہے۔ مبینہ طور پر 14 اپریل کو بابا صاحب امبیڈکر کے یوم پیدائش کے موقع پر ان کے مجسمہ کوکسی دوسری کی زمین پر نصب کیا تھا جس کی شکایت پر مقامی پولیس اور انتظامیہ نے غیر قانونی طور پر رکھی مورتی کو ہٹا دیا۔ معاملہ سمر پور شہر کے تروینی میدان کا ہے۔

آج تک کی رپورٹ کے مطابق انتظامیہ کی اس کارروائی کے خلاف دلتوں نے نیشنل ہائی وے کو 10 گھنٹے تک بلاک کر کے احتجاج کیا۔ اس مظاہرے کے بعد پولیس نے یہ مورتی دلتوں کو واپس کردی لیکن اسے متنازع مقام پر رکھنے کی اجازت نہیں دی۔

اتنا ہی نہیں، پولیس نے نیشنل ہائی وے کو بلاک کرنے والے لوگوں کے خلاف ایف آئی آر درج کر لی، جس کی وجہ سے ہزاروں دلتوں نے مذہب تبدیل کرنے کی دھمکی دی ہے۔

دلتوں کے اس اعلان نے ضلع انتظامیہ کی نیندیں اڑا دی ہیں۔ اتنی بڑی تعداد میں مذہب کی تبدیلی کے اعلان کے بعد بھی ضلع انتظامیہ اور پولیس حکام کچھ کہنے کو تیار نہیں ہیں۔

دراصل امبیڈکر جینتی کے موقع پر تروینی میدان میں ایک چبوترہ بنا کر ڈاکٹر بھیم راؤ امبیڈکر کا مجسمہ نصب کیا گیا تھا۔ اس مورتی کو کہاں نصب کیا گیا تھا، اس بارے میں امر سنگھ نامی شخص نے دعویٰ کیا کہ یہ ان کی زمین ہے اور پولیس اسٹیشن میں شکایت درج کرائی ہے۔

امر سنگھ کی شکایت پر پولیس نے رات میں ہی مورتی کو ہٹاتے ہوئے زمین کو اپنے قبضے میں لے لیا۔ تاہم اس کے بعد سیکڑوں لوگ قومی شاہراہ پر اتر آئے اور احتجاج شروع کردیا۔ اس دوران ان کی پولیس سے ہاتھا پائی بھی ہوئی۔ احتجاج کے باعث نیشنل ہائی وے پر 6 گھنٹے تک جام رہا۔

پولیس کے اعلیٰ افسران نے مداخلت کرتے ہوئے مورتی لوگوں کو واپس کردی اور اسے کسی اور جگہ نصب کرنے کی ہدایت کی۔ تاہم مظاہرین اس بات پر بضد رہے کہ مجسمہ کو اسی جگہ لگایا جائے گا جہاں پہلے تھا کیونکہ ان کے پاس اس زمین کا معاہدہ ہے۔

دلتوں نے کی مورتی نصب کرنے کی مانگ

بابا صاحب کے پیروکار ودھ ناتھ ورما، رویندر کمار سمیت درجنوں لوگوں نے بتایا کہ زمین کی ملکیت کا دعویٰ کرنے والے امر سنگھ نے تحریری معاہدہ کیا تھا کہ اس نے زمین عطیہ کی تھی، جس کے بعد چبوترہ بنا کر بابا صاحب کا مجسمہ نصب کیا گیا۔ لیکن اب امر سنگھ نے اپنے معاہدے سے مکر گئے اور پولیس کے ساتھ مل کر بابا صاحب کی مورتی کو زبردستی ہٹا دیا، اس سے ان کی توہین ہوئی ہے۔

بابا صاحب امبیڈکر کے پیروکاروں نے دھمکی دی ہے کہ اگر پولیس نے ان کا مجسمہ اسی جگہ پر نصب کرنے اور قومی شاہراہ کو بلاک کرنے پر کوئی مقدمہ درج کیا تو ان کی برادری کے ہزاروں لوگ بدھ مت اختیار کر لیں گے۔

تاہم، سمر پور تھانہ انچارج درگا وجے سنگھ نے اس معاملے میں کوئی مقدمہ درج کرنے سے انکار کر دیا ہے۔