واشنگٹن: دو اعلیٰ امریکی قانون سازوں نے گزشتہ ماہ نیو جرسی کے ایڈیسن میں ‘انڈیا ڈے پریڈ’ میں بلڈوزر کے مظاہرے کی مذمت کی ہے۔سینیٹرز باب مینینڈیز اور کوری بکر نے اس ہفتے انڈین امریکن مسلم کونسل کے ایک وفد اور کئی کمیونٹی گروپس سے ملاقات کی جو ایڈیسن سٹی میں انڈیا ڈے کی مقبول پریڈ میں بلڈوزر چلانے کے خلاف تھے۔مسلم گروپوں نے الزام لگایا کہ بلڈوزر نفرت پر مبنی جرائم کی علامت بن گیا ہے اور دعویٰ کیا کہ اتر پردیش کے وزیر اعلیٰ یوگی آدتیہ ناتھ نے ان کا استعمال خاص طور پر مخصوص کمیونٹی کو نشانہ بنانے کے لیے کیا۔ تاہم حکومت ہند نے اس الزام بے بنیاد بتایا۔
‘دی پرنٹ’ میں شایع للت جھا نے بھاشا ایجنسی کے حوالے سے اپنی رپورٹ میں لکھا کہ سینیٹرز مینینڈیز اور بکر نے ایک مشترکہ بیان میں کہا، "اس ہفتے ہم نے نیو جرسی میں جنوبی ایشیائی کمیونٹی کے رہنماؤں اور اراکین سے ملاقات کی، جو گزشتہ ماہ ایڈیسن میں انڈیا ڈے پریڈ میں بلڈوزر کے مظاہرے سے شدید ناراض اور زخمی ہوئے تھے۔” انہوں نے کہا کہ بلڈوزر ہندوستان میں مسلمانوں اور دیگر مذہبی اقلیتوں کو ڈرانے کی علامت بن گیا ہے اور اسے تقریب میں شامل کرنا غلط تھا۔غور طلب ہے کہ 14 اگست کو اوک ٹری روڈ پر انڈیا ڈے پریڈ کے دوران اتر پردیش کے وزیر اعلیٰ کی تصاویر والا بلڈوزر دکھایا گیا تھا۔ ایڈیسن کے میئر سام جوشی نے اس کی مذمت کی۔ اس تقریب کی منتظم انڈین بزنس ایسوسی ایشن نے معذرت کی ہے۔
