منی پور میں پھر تشدد،پولیس کمانڈو اور اسکولی اسٹوڈنٹ سمیت4ہلاک

منی پور کے میتی کی اکثریت والے بشنو پور اور کوکی قبیلے کے زیر اثر چورا چند پور اضلاع میں مسلسل تشدد جان لیوا بن گیا ہے۔بی بی سی ہندی کے مطابق جمعہ کو مسلسل فائرنگ کے واقعے میں منی پور پولیس کے ایک کمانڈو اور ایک اسکول کے بچے سمیت کم از کم چار افراد ہلاک ہو گئے۔
بشنو پور ضلع کے ایک پولیس افسر نے بتایا کہ مشتبہ انتہا پسند پچھلے کئی دنوں سے علاقے میں لگاتار فائرنگ کر رہے ہیں۔ شورش زدہ ضلع میں کئی مقامات پر جمعہ کو دن بھر فائرنگ جاری رہی۔
بی بی سی نے بتایا کہ اس فائرنگ میں پولیس کمانڈو پکھرممبم رنبیر کو گولی لگی، جو اسپتال لے جاتے ہوئے دم توڑ گیا۔ جبکہ ضلع چورا چند پور کے علاقے کنگوائی میں فائرنگ سے دو افراد ہلاک اور تین زخمی ہوگئے
3 مئی کو منی پور میں تشدد شروع ہونے کے بعد سے کانگوائی علاقہ ایک حساس علاقہ رہا ہے۔راجدھانی امپھال سے صرف 30 کلومیٹر دور بشنو پور ضلع کے فوگاکچاو اکھائی پولیس اسٹیشن کے تحت کواکٹا میں جمعہ کو مشتبہ انتہا پسندوں کے حملے میں ایک اسکولی بچہ ہلاک ہوگیا۔
ایک 17 سالہ طالب علم، میانگلممبم رکی نے اس سال بارہویں جماعت پاس کی۔ اس واقعہ کے بعد مشتعل مقامی لوگوں نے ہاتھوں میں پلے کارڈز لے کر مورانگ ملٹی پرپز ہائیر سیکنڈری اسکول کے سامنے احتجاج کیا۔ ان لوگوں کے پلے کارڈز پر لکھا تھا ’’طلبہ کا قتل بند کرو، ہم امن چاہتے ہیں۔‘‘
منی پور پولیس کا دعویٰ ہے کہ پولیس اور مرکزی سیکورٹی فورسز کی مشترکہ ٹیم نے جمعہ کو امپھال ایسٹ، امپھال ویسٹ، چورا چند پور، بشنو پور اور کاکچنگ اضلاع میں 18 بنکروں کو تباہ کر دیا۔ جبکہ پچھلے 24 گھنٹوں میں، سیکورٹی فورسز نے امپھال مشرقی ضلع سے پانچ ہتھیار، 74 گولہ بارود، پانچ ایچ ای ہینڈ گرنیڈ برآمد کیے ہیں۔منی پور میں اس نسلی تشدد کو شروع ہوئے دو ماہ سے زیادہ کا عرصہ گزر چکا ہے اور اب تک اس تشدد میں 140 سے زائد افراد اپنی جانیں گنوا چکے ہیں۔ جبکہ تین ہزار سے زائد افراد زخمی ہوئے ہیں۔