کولکاتا :(ایجنسی)
بنگال کی قانون ساز اسمبلی میں مارپیٹ کا معاملہ سامنے آیا ہے۔ بی جے پی اور ٹی ایم سی ایم ایل اے کے درمیان لڑائی ہوگئی۔ معلومات کے مطابق بنگال اسمبلی میں بی جے پی ایم ایل اے منوج تیگا اور ٹی ایم سی ایم ایل اے آسیت مجمدار کے درمیان لڑائی ہوئی۔ اس لڑائی میں آسیت مجمدار زخمی بتائے جارہے ہیں، جنہیں اسپتال لے جایا گیا ہے۔
معلومات کے مطابق، بی جے پی کے پانچ ممبران اسمبلی بشمول شوبھندو ادھیکاری کو اسمبلی سے معطل کر دیا گیا ہے۔ معطل ایم ایل اے کے ناموں میں شوبھندو ادھیکاری، منوج تیگا، نارہاری مہتو، شنکر گھوش، دیپک برمن شامل ہیں۔ انہیں اگلے احکامات تک معطل کر دیا گیا ہے۔
بتا دیں کہ بنگال قانون ساز اسمبلی کے بجٹ اجلاس کا آج آخری دن ہے۔ مبینہ حملہ کے بعد بی جے پی ایم ایل اے اسمبلی سے باہر آگئے۔ بی جے پی ایم ایل ایز نے الزام لگایا ہے کہ وہ بیر بھوم پر بحث چاہتے تھے، جس پر مبینہ طور پر ہنگامہ آرائی کے بعد ٹی ایم سی ایم ایل ایز نے دھکا مکی -مار پیٹ کی۔
بی جے پی ایم ایل اے منوج تیگا نے اسمبلی کے باہر احتجاج کے دوران کہا کہ ٹی ایم سی ایم ایل اے نے انہیں دھکا دیا اور گھونسے مارے۔ انہوں نے اپنی شرٹ پھٹنے کی بات بھی کی۔ اس کے بعد بی جے پی کے ایم ایل اے اور بنگال اسمبلی میں اپوزیشن لیڈر شوبھندو ادھیکاری نے اسمبلی کے باہر نعرے لگائے۔
ہنگامہ کے بعد بی جے پی لیڈر سی ایم ممتا بنرجی پر حملہ آور ہیں۔ بی جے پی کے سینئر لیڈر بی ایل سنتوش نے لکھا کہ بنگال کی سیاست میں ایک نیا زوال دیکھا گیا ہے۔ ممتا بنرجی کے سی ایم بننے کے بعد سے سطح گر رہی ہے۔ آج بی جے پی ایم ایل اے منوج تیگا اور دیگر پر حملہ کیا گیا ہے۔
