ہم ڈرنے نہیں لڑنے والے ہیں، مودی کا غبار جلد ختم ہو جائے گا: تیجسوی کی للکار

ممبئی :بھارت جوڑو نیائے یاترا کے اختتام پر انڈیا الائنس کی ریلی میں سرکردہ لیڈر شامل تھے جنھوں نے اپنی تقریر سے لوگوں میں جوش بھردیا اس میں موجود آر جے ڈی کے لیڈر تیجسوی یادو نے کہا کہ ہم ڈرنے والے لوگ نہیں ہیں، ہم لڑنے والے لوگ ہیں۔ اپنے لیے نہیں بلکہ آپ کے لئے لڑنے والے ہیں اور آپ کی لڑائی لڑیں گے۔ انہوں نے کہا کہ ڈاکٹر نے لالو جی کو زیادہ گھومنے پھرنے سے منع کردیا ہے لیکن وہ اس حالت میں بھی نریندر مودی کا علاج کرنے کے لیے کافی ہیں۔ انہوں نے عوام سے اپیل کرتے ہوئے کہا کہ ان بی جے پی کے لوگوں سے بچ کے رہئے، یہ لوگ گوبر کو بھی حلوہ بتاکر پیش کردیتے ہیں۔ تیجسوی یادو نے کہا کہ مودی جی بہت گارنٹی دیتے پھرتے ہیں، ذرا وہ ہمارے چاچا (نتیش کمار) کی گارنٹی دے کر دکھائیں کہ وہ بی جے پی کا ساتھ نہیں چھوڑیں گے۔
انہوں  نے زوردار بہاری اسٹائل میں  کہا کہ  آج ملک میں مہنگائی و بے روزگاری کی کوئی بات نہیں ہوتی ہے جبکہ اگر مودی جی سمندر کے اندر چلے جائیں گے تو سب طرف اس کی ہی چرچا ہونے لگتی ہے۔ انہوں نے کہا کہ جب ہم مودی حکومت سے ان کے وعدوں کے بارے میں سوال کرتے ہیں اور پوچھتے ہیں کہ کیا ہوا دو کروڑ نوکریوں کا ، کیا ہوا کسانوں کی اّمدنی دوگنی کرنے کا تو یہ گودی میڈیا اور بی جے کے لوگ ہمیں انرجی ڈرنک پی پی کر گالیاں دیتے ہیں۔ ہم نے پٹنہ میں جن وشواش ریلی کی، جس میں دس لاکھ لوگ آئے اور آج کی ریلی بھی دیکھ کر بی جے پی کے لوگوں کو انرجی ڈرنک پینا پڑے گی۔
تیجسوی نے کہا کہ راہل گاندھی کی طرح نیتاؤں کو زمین پر اتر کر جنتا کے ساتھ  رہنا  ہوگا تبھی زمینی حقائق کا پتہ چلے گا ان کا کہنا تھا کہ ہم ہاریں یا جیتیں  لیکن لڑائی جاری رہے گی