کون ہیں شاہنواز ریحان،آکسفورڈ ریسرچر،ایس آئی او کا سابق لیڈر اور مالدہ دکشن سے ٹی ایم سی کا امیدوار ؟

مغربی بنگال کے مالدہ جنوبی حلقے میں، ترنمول کانگریس کے امیدوار 42 سالہ ماہر تعلیم اور سابق صحافی شاہنواز علی ریحان ہیں، جو مارکسی تاریخ کے ماہر ہیں اور سی اے اے مخالف مظاہروں میں نمایاں رول ادا کرنے والی نوجوان شخصیات میں سے ایک ہیں۔
ریحان آکسفورڈ یونیورسٹی میں  2018 سے آکسفورڈ یونیورسٹی کے سینٹ انٹونی کالج سے اپنا ڈی فل کر رہے ہیں جو کہ معروف مورخ فیصل دیوجی کی نگرانی میں "Bitween Marx and Muhammed-Muslims and Communism in Bengal” کے ارد گرد ہے وہ سی اے اے کے   سخت ناقد اور مخالف رہے ہیں۔۔
دی ہندو سے بات کرتے ہوئے انہوں نے کہا ’’میں شروع سے ہی سیاست میں دلچسپی رکھتا ہوں۔ مجھے نوآبادیاتی مخالف تحریک کی تاریخ اور گاندھی، نہرو، مظفر احمد، سبھاش چندر بوس، چترنجن (داس)، فضل الحق اور ان تمام قدآور شخصیات کی تاریخ کا مطالعہ کرنا تھا اور انہوں نے حالات کو کیسے ہینڈل کیا،‘‘
2019 میں،  لندن میں ہندوستانی ہائی کمیشن کے سامنے شہریت ترمیمی قانون (CAA) اور نیشنل رجسٹر آف سٹیزن (NRC) کے خلاف احتجاج کی قیادت کی۔
انہوں نے مزید بتایا کہ سی اے اے نہ صرف مسلم مخالف ہے بلکہ بنگالی بھی مخالف ہے۔ آسام میں بی جے پی کا تجربہ اس بات کو ثابت کرتا ہے۔ بنگالی شناخت اور کھانے کی عادت کا مذاق اڑانے کی جان بوجھ کر کوشش کی جا رہی ہے،” ۔
آکسفورڈ ڈاکٹریٹ فیلو جماعت اسلامی ہند کی طلبا تنظیم اسٹوڈنٹس اسلامک آرگنائزیشن آف انڈیا کے سابق نیشنل سکریٹری   ہیں۔
اس انتخاب میں ان کا مقابلہ انڈین نیشنل کانگریس کے عیسیٰ خان چودھری سے ہے جو اس نشست کا دفاع کر رہے ہیں جس کی نمائندگی ان کے والد ابو حسام خان چودھری نے گزشتہ پانچ سالوں میں کی تھی۔ سری روپا مترا چودھری بی جے پی کے ٹکٹ پر الیکشن لڑ رہی ہیں۔
جہاں کانگریس نے 2019 میں سیٹ جیتی تھی، وہیں ترنمول نے 2021 کے اسمبلی انتخابات میں اس علاقے میں کلین سویپ کیا۔ حلقے میں ووٹروں کی اکثریت مسلمانوں کی ہے۔ان کی امیدواری کے اعلان کے بعد سے، دائیں بازو کی بھارتیہ جنتا پارٹی ٹی ایم سی کو نشانہ بنا رہی ہے اور اس اقدام کو "مسلم جنونیت کو ہوا دینے کا حربہ” قرار دے رہی ہے۔
انڈین ایکسپریس کے مطابق ٹی ایم سی نے ریحان کی تعلیمی قابلیت کی روشنی میں ان کی امیدواری کی حمایت کی ہے۔ پارٹی کے ریاستی ترجمان ریجو دتہ نے کہا ہے کہ ’’شاہنواز علی ریحان کی تعلیمی کامیابیاں اور سماجی انصاف کے لیے وابستگی روشن مثالیں ہیں۔ اسے داغدار کرنے کی کوشش صرف ان کی مایوسی کی عکاسی کرتی ہے۔ بنگال ایسے لیڈروں کا مستحق ہے جو حقائق کو سنبھال سکیں، خوف زدہ نہ ہوں۔ "کھیلا ہوبے”،
مالدہ دکشن میں لوک سبھا انتخابات کے تیسرے مرحلے میں 7 مئی کو پولنگ ہو رہی ہے۔