لکھنؤ(ایجنسی)
اتر پردیش میں تمام مذہبی رہنماؤں کی رضامندی سے مذہبی مقامات سے اضافی لاؤڈ اسپیکر ہٹانے کا کام تیزی سے جاری ہے۔ پولیس اور انتظامیہ کے اہلکاروں نے اب تک ریاست کے مختلف مذہبی مقامات سے 45,773 لاؤڈ اسپیکرس کو ہٹا دیا ہے۔ ساتھ ہی معیار کے مطابق 58,861 لاؤڈ اسپیکر کی آواز کو کم کیا گیا ہے۔
اتر پردیش پولیس ڈپارٹمنٹ کے ایڈیشنل ڈائریکٹر جنرل آف پولیس (امن و امان) پرشانت کمار نے ہفتہ کے روز بتایا کہ ریاستی حکومت کے احکامات پر سختی سے عمل کیا جا رہا ہے۔ تمام مذاہب کے گرووں کی رضامندی کے بعد مذہبی مقامات سے اضافی لاؤڈ اسپیکر ہٹانے کا کام کیا جا رہا ہے۔ کچھ لوگوں نے تو خودہی لاؤڈ اسپیکر اتار دیا ہے۔
واضح رہے کہ ریاستی محکمہ داخلہ کے ایڈیشنل چیف سکریٹری اونیش اوستھی نے حکم نامہ جاری کرتے ہوئے تمام تھانوں کو ہدایت دی تھی کہ خصوصی مہم چلا کر غیر قانونی اور بلند آواز والے لاؤڈ اسپیکرس کو ہٹایا جائے۔ کارروائی کی رپورٹ 30 اپریل تک حکومت کو بھیجنی تھی۔ اور ایسا نہ کرنے پر متعلقہ اسٹیشن انچارج کے خلاف کارروائی کی جائے گی۔ اس کے بعد پولیس اور ضلع انتظامیہ نے 26 اپریل سے لاوڈ اسپیکر کو ہٹانا شروع کر دیاتھا۔
