اجین ؍بھوپال :(ایجنسی)
مدھیہ پردیش کے اجین ضلع میں محض 21 سالہ لکشیکا ڈگر اپنے گاؤں کی مکھیا بن گئی ہیں۔ دعویٰ کیا جا رہا ہے کہ انہوں نے چنتامن جواسیہ پنچایت میں سرپنچ کا انتخاب 487 ووٹوں سے جیت لیاہے۔ تاہم ریاستی الیکشن کمیشن نے انہیں ابھی تک جیت کا سرٹیفکیٹ نہیں دیا ہے۔ اب ان کے گاؤں گھر میں خوشی کا ماحول ہے۔
اجین ضلع کی تحصیل اور گرام پنچایت چنتامن جواسیہ کے رہنے والے دلیپ ڈاگر ڈسٹرکٹ کوآپریٹو سنٹرل بینک میں ریجنل آفیسر ہیں۔ ان کی 21 سالہ بیٹی لکشیکا ڈاگر نے انتخابات میں اپنی 8 حریف خواتین امیدواروں کو شکست دی ہے۔
اس نے اجین شہر میں انڈین انسٹی ٹیوٹ آف پروفیشنل اسٹڈیز میں میڈیا کی تعلیم حاصل کی ہے۔ اس کے ساتھ وہ ضلع کے پہلے کمیونٹی ریڈیو ’ریڈیو دستک 90.8 ایف ایم‘ میں آر جے یعنی ریڈیو جوکی کا کردار بھی نبھا رہی ہیں۔ اس کے علاوہ وہ ایک مقامی نیوز چینل میں اینکرنگ بھی کرتی ہیں۔
کسانوں کو قرض سے آزاد کرنے پر زور
اپنی جیت کے بعد سرپنچ بننے والی لکشیکا نے کہا، میں سب کا شکریہ ادا کرنا چاہتی ہوں۔ پورے گاؤں نے مجھ پر اتنا آشیرواداور محبتیں نچھاور کیں کہ میں ہمیشہ ان کا شکر گزار رہوں گی۔ میں گاؤں کو ترقی دے کر اس احسان کا بدلہ چکانا چاہتی ہوں۔ کسانوں کا بنیادی مسئلہ یہ ہے کہ جنگلی جانور ان کی فصلوں کو تباہ کر دیتے ہیں۔ ساتھ ہی بارش اور ژالہ باری کی وجہ سے فصلیں بھی خراب ہو جاتی ہیں، ایسے میں اگر کسانوں کا کچھ قرض معاف کرپاؤں تو اچھا ہو گا۔
انہوں نے مزید کہا کہ پہلے پنچایت بھون کبھی کھلا نہیں رہتا تھا، لیکن اب کھلا رہے گا۔ سبھی کے مسائلسنے جائیں گے اور ان کا مسئلہ حل کیا جائے گا۔ لکشیکا ڈاگر نے کہا کہ ان 5 سالوں میں میں اتنی تبدیلی لاؤں گی کہ جب بھی کوئی دوسرا سرپنچ بنے تو لوگ اسے کہیں کہ لکشیکا کی طرح کام کریں۔ خاص بات یہ ہے کہ لکشیکا کو ان کی سالگرہ کے موقع پر سرپنچ کے عہدے کا تحفہ ملا ہے۔
بتا دیں کہ مدھیہ پردیش پنچایت انتخابات کے پہلے مرحلے کی ووٹنگ 25 جون کو ہو چکیہے۔ اس کے غیر اعلانیہ نتائج بھی آ چکے ہیں۔ اب دوسرے مرحلے کی پولنگ یکم جولائی اور آخری اور تیسرے مرحلے کی ووٹنگ 8 جولائی کو ہوگی۔ اس کے بعد پنچ تا ضلع پنچایت ممبران کے عہدوں کے لیے ووٹوں کی گنتی 8 جولائی، 11 جولائی، 14 جولائی اور 15 جولائی کو ہوگی۔ ریاست کے کل 52 اضلاع میں 875 ضلع پنچایت ممبران، 6 ہزار 771 جن پد پنچایت ممبران سمیت 22 ہزار 921 سرپنچ اور 3 لاکھ 63 ہزار 726 پنچوں کے لیے انتخابی عمل 30 مئی سے شروع ہو گیا ہے۔
