بنگلہ دیش: لنچنگ کے جرم  میں ایک کو سزائے موت، چار کو عمر قید،جرمانہ بھی

ڈھاکہ:2019 میں تسلیمہ بیگم رینو کی لنچنگ کے جرم میں ایک عدالت نے ایک شخص کو موت اور چار دیگر کو عمر قید کی سزا سنائی ہے، جسے ڈھاکہ کے بڈہ میں بچہ اغوا کرنے کے شبہ میں قتل کیا گیا تھا۔ ڈھاکہ کے چھٹے ایڈیشنل میٹروپولیٹن سیشن جج کی عدالت کے جج مرشد احمد نے بدھ کو فیصلہ سنایا۔
ڈھاکہ ٹریبون کی خبر کے مطابق ابراہیم عرف ہردوئے مولا کو سزائے موت جبکہ ریا بیگم موئنہ، ابوالکلام آزاد، کمال حسین اور اسد الاسلام کو عمر قید کی سزا سنائی گئی۔ عدالت نے سزا یافتہ افراد پر ایک ایک لاکھ روپے جرمانہ بھی عائد کیا۔جج نے 8 ملزمان محمد شاہین، بچو میا، محمد بپی، مراد میا، سہیل رانا، بلال مولا، محمد راجو اور محین الدین کو عدم ثبوت کی بنا پر بری کردیا۔
20 جولائی، 2019 کو، رینو کو اتر بڈہ میں مشتعل ہجوم نے اس وقت بے دردی سے پیٹا جب اس پر بچہ اغوا کرنے کا شبہ تھا۔
اسے ڈھاکہ میڈیکل کالج ہسپتال لے جایا گیا، جہاں اسے مردہ قرار دے دیا گیا۔ اسی دن رینو کے بھتیجے ناصر الدین نے بڈہ پولیس میں 400-500 نامعلوم افراد کے خلاف قتل کا مقدمہ درج کرایا۔
10 ستمبر 2020 کو، تفتیشی افسر، پولیس کی جاسوسی برانچ (DB) کے انسپکٹر عبدالحق نے ڈھاکہ میٹروپولیٹن مجسٹریٹ کی عدالت میں 15 افراد کے خلاف الزامات عائد کیے تھے۔
یکم اپریل 2021 کو چھٹے ایڈیشنل میٹروپولیٹن سیشن جج کی عدالت کی جج فاطمہ امروز خونیکا نے 13 ملزمان کے خلاف فرد جرم عائد کی۔
پولیس چارج شیٹ میں نامزد دو افراد، جعفر حسین پٹواری اور وسیم احمد، جو اس وقت نابالغ تھے، پر نابالغ عدالت میں الگ سے مقدمہ چلایا جا رہا ہے۔