امرت پال اب تک پولیس کی گرفت سے دور،چھاپے جاری، 114 ساتھی گرفتار

خالصتانی حامی امرت پال سنگھ ابھی تک مفرور ہے۔ گزشتہ چار دنوں سے پولیس اس کی تلاش میں ہے۔ جس کار میں وہ فرار ہوا تھا اسے بھی پولیس نے برآمد کر لیا ہے۔ اس دوران امرت پال سنگھ کے پاکستان کی خفیہ ایجنسی سے تعلق کی بھی بات ہو رہی ہے۔ امرت پال سنگھ کے چچا ہرجیت سنگھ کو آج صبح آسام کے ڈبروگڑھ لے جایا گیا۔ اتوار کو امرت پال کے چار گرفتار ساتھیوں کو بھی ڈبرو گڑھ سینٹرل جیل لے جایا گیا۔
امرت پال سنگھ کے چچا اور دیگر چھ ساتھیوں پر سخت قومی سلامتی ایکٹ (این ایس اے) کے تحت الزام عائد کیا گیا ہے، جو پولیس کو ملک بھر کی کسی بھی جیل میں مشتبہ افراد کو حراست میں رکھنے کی اجازت دیتا ہے۔
پنجاب کے بعض علاقوں میں موبائل انٹرنیٹ اور ایس ایم ایس سروسز جمعرات کی سہ پہر تک معطل رہیں گی۔ پڑوسی ریاست ہریانہ بھی ہائی الرٹ پر ہے۔
حکام کا کہنا ہے کہ ‘ٹاپ سیکرٹ’ آپریشن عام آدمی پارٹی کی حکومت والے پنجاب، مرکز اور بی جے پی کی حکومت والے آسام کے درمیان مشترکہ کوشش تھی۔ ذرائع کا کہنا ہے کہ پنجاب کے وزیر اعلی بھگونت مان نے 2 مارچ کو وزیر داخلہ امیت شاہ کے ساتھ ایک میٹنگ میں امرت پال سنگھ کی گرفتاری کے منصوبے پر تبادلہ خیال کیا۔ اب تک پولیس نے امرت پال سنگھ کے 114 ساتھیوں کو گرفتار کیا ہے۔ ان کی تنظیم کے کئی ارکان کو بھی پوچھ گچھ کے لیے حراست میں لیا گیا ہے۔