دہلی فساد 0202 سے متعلق ایک معاملہ میں دہلی کی عدالت نے پانچ سال بعد FIRکا حکم دیا

دہلی کی ایک عدالت نے 2020 کے شمال مشرقی دہلی فسادات سے متعلق ایک معاملے میں ایف آئی آر درج کرنے کی ہدایت دی ہے۔ یہ دیکھتے ہوئے کہ پولیس شکایت پر کارروائی کرنے میں ناکام رہی، LiveLaw نے رپورٹ کیا۔عدالت نے یہ حکم ایک شکایت پر دیا جس میں ہنگامہ آرائی، آتش زنی اور اشتعال انگیز نعرے لگانے سمیت قابل شناخت جرائم کا الزام لگایا تھا۔مءڈیا رپورٹ کے مطابق کڑکڑڈوما کورٹس کی فرسٹ کلاس جوڈیشل مجسٹریٹ   اسرا زیدی رئیس احمد کی شکایت کی سماعت کر رہی تھیں جس میں الزام لگایا گیا تھا کہ 25 فروری 2020 کو ان کے خاندان کو مہلک ہتھیاروں سے لیس ایک ہجوم نے نشانہ بنایا، اشتعال انگیز فرقہ وارانہ نعرے لگائے، گالی گلوچ کی، ان کے گھر کو لوٹا، ان کی املاک کے ایک حصے کو آگ لگا دی اور انہیں دھمکیاں دیں۔احمد کی شکایت میں کہا گیا کہ چونکہ اس معاملے کو دیگر شکایات کے ساتھ جوڑ دیا گیا تھا، اس لیے عدالت پولیس کو ایف آئی آر درج کرنے کی ہدایت دے سکتی ہے۔ اپنے 23 جولائی کے حکم میں، عدالت نے کہا کہ کراول نگر کے ایس ایچ او نے کہا ہے کہ احمد کی شکایت کو 29 دیگر شکایات کے ساتھ ملایا گیا ہے جو ملزمین کے خلاف فسادات اور آتش زنی سمیت کئی جرائم کے لیے درج کی گئی ہے۔عدالت نے کہا کہ ایف آئی آر میں احمد کی طرف سے متعدد افراد کے خلاف لگائے گئے مخصوص الزامات کا ذکر نہیں ہے۔ عدالت نے کہا کہ موجودہ کیس میں شکایت کنندہ کے الزامات سنگین اور قابل شناخت جرائم کا انکشاف کرتے ہیں۔ شکایت کنندہ نے فرقہ وارانہ تشدد، لوٹ مار، آتش زنی، نفرت انگیز تقریر جیسے سنگین الزامات لگائے ہیں۔ ان میں مخصوص افراد کے نام اور ان کے کردار شامل ہیں۔

عدالت نے کہا کہ شکایت میں درج واقعہ مختلف وقت کا ہے۔ اس میں مختلف افراد شامل تھے اور اس کی ایف آئی آر سے کوئی مماثلت نہیں ہے۔ عدالت نے کہا کہ ایسے سنگین الزامات کو محض ایک عام ایف آئی آر کے ساتھ جوڑ کر کمزور یا نظر انداز نہیں کیا جا سکتا۔اس کے بعد عدالت نے ایس ایچ او کو شکایت کنندہ کی بنیاد پر الگ ایف آئی آر درج کرنے اور منصفانہ تحقیقات کرنے کی ہدایت کی۔ عدالت نے کہا کہ واضح کیا جاتا ہے کہ انہیں فوری طور پر کسی بھی ملزم کو گرفتار کرنے کی کوئی ہدایت نہیں دی جارہی ہے۔ عدالت نے 31 جولائی کو اپنے حکم پر تعمیل رپورٹ داخل کرنے کو کہا ہے۔