خالصتان حامیوں کا یوایس میں مظاہرہ،بھارتی جرنلسٹ پر حملہ

واشنگٹن:امریکہ کےواشنگٹن ڈی سی میں ہندوستانی سفارت خانے کے باہر خالصتانیوں نے شدید احتجاج کیا اور ہنگامہ آرائی کی۔ خبر ہے کہ احتجاج کے دوران خالصتان حامیوں نے ہندوستانی صحافی للت کے جھا پر حملہ کر دیاجو مظاہرے کو کور کررہے تھے ۔ اس پورے واقعہ کی ایک ویڈیو منظر عام پر آئی ہے جس میں خالصتان حامی گالیاں دیتے نظر آ رہے ہیں۔ وہ حکومت ہند کے لیے ناشائستہ الفاظ استعمال کر رہے تھے۔واضح ہو امرت پال کے خلاف کریک ڈاؤن کے بعد خالصتان حامیوں نے امریکہ و یورپ کے کیی ملکوں میں مظاہرے کیے ہیں اور بھارت مخالف نعرے لگاے ہیں۔
متاثرہ ہندوستانی جرنلسٹ پی ٹی ایی کے نمایندے للت جھا نے بتایا کہ خالصتان حامیوں نے ان کے کان پر دو لاٹھیاں ماریں۔ اس دوران امریکی سیکرٹ سروس نے ہندوستانی صحافی کی مدد کی۔ رپورٹر نے کہا ’’مدد کے لئے شکریہ۔ حملے کے بعد میں نے 911 پر کال کی تھی۔ دو پولیس وین میں 4 لوگ آئے جنہوں نے میری مدد کی۔‘‘
خالصتان حامی مظاہرین نے امرت پال سنگھ کی حمایت میں ہندوستانی سفارت خانے کے باہر خالصتانی جھنڈے بھی لہرائے۔ اس دوران انہوں نے سرعام ہندوستانی سفارت خانے کو سبوتاژ کرنے کی دھمکیاں دیں اور ہندوستانی سفیر ترنجیت سنگھ سندھو کو بھی گالیاں دیں۔ مظاہرین خالصتان کے حق میں نعرے لگا رہے تھے۔ وہ ہندی اور انگریزی زبان میں بات کر رہے تھے اور گالیاں دے رہے تھے۔
ہندوستانی سفارت خانے نے اپنے بیان میں کہا ’’ہم ایک سینئر صحافی پر اس طرح کے سنگین اور غیر ضروری حملے کی مذمت کرتے ہیں۔ اس طرح کی سرگرمیاں نام نہاد ‘خالصتانی مظاہرین’ اور ان کے حامیوں کی پرتشدد اور سماج دشمن نوعیت کی نشاندہی کرتی ہیں، جو باقاعدگی سے تشدد اور توڑ پھوڑ میں ملوث ہیں.امریکہ نے اس واقعہ کی سخت مذمت کی ہے ۔