کانپور (ایجنسی)
کانپور میں پرتشدد تصادم کے واقعہ پر یوپی کے اے ڈی جی لاء اینڈ آرڈر پرشانت کمار کا بیان آیا ہے۔ انہوں نے بتایا کہ اب تک فساد میں ملوث 18 ملزمان کو گرفتار کیا جا چکا ہے۔ ان ملزمان کے خلاف گینگسٹر ایکٹ کے تحت کارروائی کی جائے گی۔
اے ڈی جی لاء اینڈ آرڈر نے بتایا کہ کانپور نگر کے بیکن گنج تھانہ علاقے کے نئی سڑک علاقے میں نماز جمعہ کے بعد کچھ لوگوں نے وہاں دکانیں بند کرانے کی کوشش کی، جس کی دوسری طرف کے لوگوں نے مخالفت کی۔ اس معاملے کو لے کر آپس میں جھگڑا ہوا، پتھراؤ کا واقعہ بھی ہوا۔ اس اطلاع پر پولیس فوراً موقع پر پہنچ گئی۔ پولیس فورس نے حالات پر قابو پانے کی کوشش کی۔ پولیس کمشنر سمیت دیگر افسران بھی موقع پر پہنچ گئے اور ضروری طاقت کا استعمال کرکے حالات کو قابو میں کیا۔
اب تک 18 ملزمان گرفتار
اے ڈی جی نے کہا کہ حکومت نے اس واقعہ کو بہت سنجیدگی سے لیا ہے اور اس کے لئے اضافی پولیس فورس بھیجی گئی ہے، جس میں 12 کمپنیاں اور ایک پلاٹون پی اے سی کانپور بھیجی گئی ہے۔ کچھ دوسرے افسران کو بھی کانپور بھیجا جا رہا ہے۔ کانپور میں تشدد پھیلانے والوں کی شناخت کی جا رہی ہے اب تک 18 لوگوں کو گرفتار کیا جا چکا ہے۔
پراپرٹی پر بلڈوزر چلے گا
اے ڈی جی نے کہا کہ ہمیں کافی مقدار میں ویڈیو فوٹیج ملی ہے، جس کی بنیاد پر ہم مزید کارروائی کریں گے۔ شرپسندوں کے ساتھ ساتھ سازش کرنے والوں کے خلاف گینگسٹر ایکٹ کے تحت کارروائی کی جائے گی۔ ان کی جائیداد بھی ضبط کر لی جائے گی۔ اس کے علاوہ وہاں کے لوگوں سے امن و امان برقرار رکھنے کی اپیل کی گئی ہے۔ انتظامیہ کے ساتھ تعاون کریں، شرپسندوں کی نشاندہی میں ہماری مدد کریں۔
اے ڈی جی لا ءاینڈ آرڈر نے کہا کہ کانپور کے افسران کو چوبیس گھنٹے پولیس انتظامیہ کی ڈیوٹی سنبھالنے اور ہر قیمت پر امن و امان برقرار رکھنے کی ہدایت دی گئی ہے۔ اترپردیش حکومت اور پولیس کسی بھی حالت میں امن و امان کو خراب نہیں ہونے دے گی۔
اکھلیش نے نوپور شرما کی گرفتاری کا مطالبہ کیا
سماج وادی پارٹی کے قومی صدر اکھلیش یادو نے اس واقعہ کے سلسلے میں بی جے پی لیڈر نوپور شرما کی گرفتاری کا مطالبہ کیا ہے۔ انہوں نے ٹویٹ کیا،’عزت مآب صدر، وزیر اعظم اور وزیر اعلیٰ کے شہر میں رہتے ہوئے بھی پولیس اور خفیہ ایجنسیاں کی ناکامی کی وجہ سے بی جے پی ترجمان نوپور شرما کے ذریعہ دیے گئے اشتعال انگیز سے ، کانپور میں جو بدامنی پھیلی ہے ، اس کے لئے بی جے پی لیڈر کو گرفتار کیا جائے۔ ہماری تمام امن بنائے رکھنے کی اپیل ہے ۔
