مختار کے بیٹے عباس انصاری کی اسمبلی رکنیت بحال، ہائی کورٹ سے بڑی ریلیف، 2 سال کی سزا منسوخ

مختار انصاری مرحوم  کے بیٹے اور سابق ایم ایل اے عباس انصاری کو الہ آباد ہائی کورٹ سے بڑی راحت ملی ہے۔ ہائی کورٹ نے عباس انصاری کو ایم پی-ایم ایل اے کی خصوصی عدالت کی طرف سے سنائی گئی 2 سال کی سزا کو منسوخ کر دیا ہے۔ اس صورت میں انصاری کا ایم ایل اے کا درجہ بحال ہو جائے گا۔ جسٹس سمیر جین کی سنگل بنچ نے یہ فیصلہ سنایا۔
غور طلب ہے کہ عباس انصاری نے ہائی کورٹ میں اپنی سزا کو منسوخ کرنے کی درخواست دائر کی تھی۔ درخواست کی منظوری کے بعد عباس کی قانون ساز اسمبلی کی رکنیت اب بحال ہو جائے گی۔ ہائی کورٹ نے 30 جولائی کو فریقین کے دلائل مکمل ہونے کے بعد فیصلہ محفوظ کر لیا تھا۔ آج عدالت نے اپنا فیصلہ سنا دیا۔ اس فیصلے کے بعد اب مئؤ کی صدر اسمبلی سیٹ پر کوئی ضمنی انتخاب نہیں ہوگا۔
واضح رہے کہ 31 مئی کو مئؤ کی ایم پی-ایم ایل اے کورٹ نے 2022 کے اسمبلی انتخابات کے دوران اشتعال انگیز تقریر کے معاملے میں عباس کو 2 سال کی سزا اور 3000 جرمانے کی سزا سنائی تھی۔ اس بنیاد پر عباس یکم جون 2025 کو قانون ساز اسمبلی کی رکنیت سے ہاتھ دھو بیٹھے۔ڈسٹرکٹ جج ماؤ کی عدالت نے 5 جولائی کو اپیل مسترد کر دی تھی۔جس کے بعد عباس انصاری نے ہائی کورٹ میں درخواست دائر کرتے ہوئے ڈسٹرکٹ جج ماؤ کے حکم کو چیلنج کیا۔ عباس کی طرف سے وکیل اوپیندر اپادھیائے نے کیس پیش کیا۔ جبکہ یوپی حکومت کی طرف سے ایڈوکیٹ جنرل اجے کمار مشرا اور ایڈیشنل ایڈوکیٹ جنرل ایم سی چترویدی نے دلائل پیش کئے۔ انہوں نے ایم پی ایم ایل اے اسپیشل کورٹ ماؤ کے فیصلے پر روک لگانے کی مخالفت کی۔