نئی دہلی :(ایجنسی)
کولکاتا پولیس نے بی جے پی کی معطل لیڈر نوپور شرما کو پیغمبر اسلام کے بارے میں متنازعہ ریمارکس کے سلسلے میں 25 جون کو دوبارہ سمن جاری کیا ہے۔ کولکاتا پولیس کے ایک افسر نے جمعرات کو اس سلسلے میں معلومات دی۔
دی ہندو کی خبر کے مطابق یہ دوسرا موقع ہے جب نوپور شرما کو کولکاتا پولیس نے گستاخی کے معاملے میں طلب کیا ہے۔
پولیس افسر نے بتایا کہ نوپور شرما کے خلاف شمالی کولکاتا کے ایمہرسٹ اسٹریٹ پولیس اسٹیشن میں شکایت درج کرائی گئی تھی اور اسی کے تحت سمن بھیجا گیا تھا۔
نوپور شرما کے خلاف کولکاتا کے دس مختلف تھانوں میں پیغمبر اسلام کے بارے میں قابل اعتراض ریمارکس کے سلسلے میں شکایت درج کرائی گئی ہے۔ نوپور کے پیغمبر محمدؐ کے بارے میں تبصرے کے بعد ریاست کے کئی علاقوں میں تشدد پھوٹ پڑاتھا۔
قبل ازیں انہیں نارکل دانگا پولیس اسٹیشن نے سمن بھیجا تھا۔ لیکن انہوں نے سمن رسیونہیں کیا اور چار ہفتے کا وقت مانگا گیا تھا۔ اپنے جواب میں انہوں نے کہا تھا کہ انہیں خدشہ ہے کہ اگر وہ کولکاتا آئیں تو ان پر حملہ کیا جائے گا۔
نوپور شرما نے ایک ٹی وی مباحثے کے دوران پیغمبر اسلام محمدؐ پر متنازعہ تبصرہ کیا تھا جس کے بعد ملک کے مختلف حصوں کے ساتھ ساتھ مغربی بنگال کے ہاوڑہ، نادیہ اور مرشد آباد میں تشدد پھوٹ پڑا تھا۔ تاہم تنازع بڑھنے کے بعد نوپور شرما نے اپنا بیان مکمل طور پر واپس لے لیا۔
اس سے قبل 18 جون کو خبر آئی تھی کہ ممبئی پولیس جو کہ نوپور شرما کو سمن دینے دہلی آئی تھی، چار دن گزرنے کے بعد بھی نوپور نہیں ملی، اس لیے انہیں سمن ای میل کرنا پڑا۔ ٹائمز آف انڈیا اخبار نے ایک سینئر پولیس افسر کے حوالے سے بتایا کہ وہ چار دن سے دہلی میں ہیں لیکن وہ نوپور شرما کو نہیں ڈھونڈ سکے۔
