نئی دہلی:(نامہ نگار)
پیر کو دہلی اقلیتی کمیشن (ڈی ایم سی) میں مجاہد آزادی حکیم اجمل خان کے ملک کی ترقی میں دیے گئے تعاون کو یاد کرنے کے لیے ایک سیمینار کا انعقاد کیا گیا۔ سیمینار کے بعد متفقہ طور پر ایک قرارداد منظور کی گئی، جس میں دہلی حکومت سے مطالبہ کیا گیا کہ حکیم اجمل خان کے ذریعہ قرول باغ میں قائم کی گئی اے اینڈ یو طبیہ کالج کو حکیم اجمل خان آیوش یونیورسٹی کے طور پر ترقی دے۔ کیونکہ طبیہ کالج کے پاس 33 ایکڑ سے زائد اراضی ہے اور اس نے 102 سال مکمل کر لیے ہیں۔ اس لیے یونیورسٹی کی شکل میں ترقی پانا اس کا حق بنتا ہے۔
سیمینار میں دہلی وقف بورڈ کے چیئرمین امانت اللہ خان مہمان خصوصی کے طور پر موجود تھے۔ جبکہ دہلی اقلیتی کمیشن کے چیئرمین ذاکر خان، کمیشن کے ارکان کے ساتھ اے پی ایس بندہ اور نینسی بارلو نے خصوصی تعاون کیا۔ سیمینار کے دوران ڈاکٹر سید احمد خان کو یونانی میں ان کی خصوصی خدمات اور طویل عرصے تک لوگوں کی خدمت کرنے پر اعزاز سے نوازا گیا۔ اس کے ساتھ تہاڑ جیل کے سی ایم او آیوش پروفیسر ڈاکٹر ادریس کو بھی ان کی خدمات کے لیے اعزاز سے نوازا گیا۔
