ممبئی کی میٹنگ میں کچھ نئی پارٹیاں شامل ہوں گی: نتیش کا دعویٰ

پٹنہ: بہار کے وزیر اعلی نتیش کمار نے اتوار کو کہا کہ ممبئی میں اپوزیشن اتحاد ‘انڈیا’ (انڈین نیشنل ڈیولپمنٹ انکلوسیو الائنس) کی آئندہ میٹنگ کے دوران کچھ اور سیاسی پارٹیوں کے اس میں شامل ہونے کا امکان ہے۔ نتیش، جو بی جے پی مخالف پارٹیوں کو اکٹھا کرنے میں کلیدی کردار ادا کر رہے ہیں، نے ‘انڈیا’ میں شامل ہونے والی ممکنہ پارٹیوں کے نام ظاہر نہیں کیے، لیکن انھوں نے یہ کہا کہ انتخابات سے متعلق مسائل جیسے سیٹوں کی تقسیم پر بات چیت کی جائے گی۔
این ڈی ٹی وی کے مطابق پٹنہ میں صحافیوں سے بات کرتے ہوئے نتیش کمار نے کہا، ‘ہم ممبئی میں ہونے والی میٹنگ کے دوران اگلے سال کے عام انتخابات کے لیے ‘انڈیا’ کی حکمت عملی پر بات کریں گے۔ نشستوں کی تقسیم جیسے مسائل پر تبادلہ خیال کیا جائے گا اور کئی دیگر ایجنڈوں کو حتمی شکل دی جائے گی۔ کچھ اور سیاسی جماعتیں ہمارے اتحاد میں شامل ہوں گی۔ انہوں نے کہا، ‘میں 2024 کے لوک سبھا انتخابات سے پہلے زیادہ سے زیادہ پارٹیوں کو متحد کرنا چاہتا ہوں۔ میں اس سمت میں کام کر رہا ہوں… مجھے اپنے لیے کوئی خواہش نہیں ہے۔
لوک سبھا انتخابات میں مرکز میں حکمراں بھارتیہ جنتا پارٹی (بی جے پی) سے مقابلہ کرنے کے لیے بنائے گئے 26 پارٹیوں کے اپوزیشن اتحاد کی ایک ماہ سے بھی کم عرصے میں دو بار میٹنگ ہوئی ہے۔ اپوزیشن اتحاد کی پہلی میٹنگ 23 جون کو پٹنہ میں ہوئی تھی اور دوسری میٹنگ 17-18 جولائی کو بنگلورو میں ہوئی تھی۔ ہندوستانی اتحاد اپنا تیسرا اجلاس 31 اگست اور 1 ستمبر کو ممبئی میں منعقد کرنے کے لیے تیار ہے۔