نئی دہلی :(ایجنسی)
دہلی اور این سی آر کے علاقوں میں سی این جی کی قیمت میں 2 روپے فی کلو کا اضافہ ہوا ہے۔ دہلی میں سی این جی کی قیمت اب 75.61 روپے فی کلو تک پہنچ گئی ہے۔ وہیں نوئیڈا، گریٹر نوئیڈا اور غازی آباد میں اس کی قیمت 78.17 روپے فی کلو تک پہنچ گئی ہے۔ گڑگاؤں میں، یہ 83.94 روپے فی کلو میں دستیاب ہے۔ نئی قیمتیں ہفتہ سے ہی نافذ ہو گئی ہیں۔
اس سے قبل 15 مئی کو سی این جی کی قیمت میں 2 روپے فی کلو اضافہ کیا گیا تھا۔ اس وقت دہلی-این سی آر میں آٹو ڈرائیوروں نے اس پر ناراضگی ظاہر کی تھی اور کہا تھا کہ اس کا براہ راست اثر ان کی جیب پر پڑ رہا ہے۔
آٹو ڈرائیوروں نے کہا کہ ان کی کمائی کا بڑا حصہ گاڑی میں ایندھن بھرنے میں جاتا ہے اور لوگ کرایہ بڑھانے کے خلاف احتجاج کرتے ہیں، ایسے میں ان کے سامنے مشکلات کھڑی ہو گئی ہیں۔
چند روز قبل گھریلو ایل پی جی سلنڈر کی قیمت میں ساڑھے تین روپے کا اضافہ ہوا تھا۔ اس کے بعد دہلی میں 14.2 کلو کے بغیر سبسڈی والے ایل پی جی سلنڈر کی قیمت 1003 روپے ہو گئی ہے۔ جبکہ ممبئی میں اس کی قیمت 1002 روپے، کولکاتا میں 1029 روپے اور چنئی میں 1018.50 روپے ہو گئی ہے۔ اس مہینے ہی گھریلو ایل پی جی سلنڈر 50روپے مہنگا ہوا تھا ۔
آپ کو بتا دیں کہ پانچ ریاستوں میں اسمبلی انتخابات کے بعد پٹرول اور ڈیزل کی قیمتوں میں اضافہ کو لے کر حکومت کو تنقید کا نشانہ بنایا گیا تھا۔ تاہم گزشتہ کئی دنوں سے ایندھن کی قیمتوں میں اضافہ نہیں ہوا ہے۔ لیکن سی این جی اور گھریلو گیس سلنڈر مہنگے ہونے سے عام آدمی کی مشکلات میں اضافہ ہو گیا ہے۔
اشیائے خوردونوش مہنگی ہونے کے باعث عوام کو مالی مشکلات کا بھی سامنا ہے۔
